A: Ma nis pak foton e Levos, apo ajo që ka qenë?
B: Jo, është shishe qelqi.
A: Çfarë date ka kjo?
B: Skadon sot në darkë ahahah.
A: Aahahah.
B: Po çfarë të them unë ty.
A: Paska skaduar dje.
Kjo është një nga dhjetëra bisedat e gjetura në rrjetin social WhatsApp nga Prokuroria e Tiranës në telefonat e dy personave të arrestuar për kontrabandë ilaçesh.
Teksa bëjnë porositë për medikamente, çështjen e skadencës së tyre, ata e trajtojnë me nota humori.
Këtë të shtunë me kërkesë të Prokurorisë, Policia vuri në pranga 16 persona dhe shpalli në kërkim 2 të tjerë, si të përfshirë në kontrabandë ilaçesh, nga Greqia, Italia dhe Kosova.
Gjatë kontrolleve në banesa dhe farmaci të ndryshme në Tiranë, Elbasan, Fier dhe Vlorë, hetuesit gjetën sasi medikamentesh që kapin vlerën e 50 mijë eurove.
Referuar dosjes hetimore që Tv Klan disponon, agjentë të infiltruar kanë kryer blerje të këtyre ilaçeve në disa raste, duke konfirmuar se ato shiteshin nëpër farmaci me çmime shumë të larta.
Në telefonat e personave të arrestuar, Prokuroria gjeti biseda të tyre për tregtimin e ilaçeve kontrabandë që prej vitit 2020.
Kërkesat më të shpeshta në këto biseda gjatë këtij viti janë për medikamentet që trajtonin Covidin, teksa nuk mungojnë porosi për ilaçe që trajtojnë tumoret dhe sëmundjet e tjera të rënda.
Hetimet për këtë dosjen kanë nisur pas arrestimit të dy specialistëve të Agjencisë së Barnave, të denoncuar në emision Stop në Tv Klan, të cilët nuk kryenin kontrolle të rregullta në farmacitë dhe nuk raportonin shkeljet.
Tv Klan
