Izraeli ka ndaluar hyrjen e të gjithë ndihmave humanitare në Gaza pas skadimit të fazës së parë të marrëveshjes së armëpushimit me Hamasin, duke përmendur refuzimin e grupit militant për një zgjatje të armëpushimit të mbështetur nga SHBA.
Faza e parë e armëpushimit në Gaza, sipas së cilës janë liruar dhjetëra pengje izraelite dhe qindra të burgosur dhe të paraburgosur palestinezë që nga mesi i janarit, arriti datën e skadimit të saj të shtunën.
Izraelitët duan që faza e parë të vazhdojë – shkëmbimi i pengjeve, të gjallë dhe të vdekur, në këmbim të lirimit të vazhdueshëm të burgosurve palestinezë, dhe rrjedhjes së vëllimeve më të larta të ndihmave në Gaza. Mendohet se 24 pengje izraelite janë ende gjallë në Gaza.
Hamasi ka këmbëngulur për të avancuar në fazën e dytë, duke akuzuar Izraelin për “manipulim të vazhdueshëm” pasi zgjatja e ndihmave do të ishte e nevojshme për shkak të fillimit të muajit të shenjtë islamik të Ramazanit dhe festën hebraike të Pashkës. Po ashtu ky është edhe propozim i të dërguarit të presidentit amerikan Donald Trump për Lindjen e Mesme, Steve Witkoff.
Zyra e Kryeministrit të Izraelit tha të dielën: “Me përfundimin e fazës A të marrëveshjes së pengjeve dhe në dritën e refuzimit të Hamasit për të pranuar kornizën Witkoff për vazhdimin e bisedimeve – për të cilat Izraeli kishte rënë dakord – Kryeministri (Benjamin) Netanyahu ka vendosur që nga mëngjesi i së dielës të gjitha hyrjet e mallrave dhe furnizimeve në Gaza do të ndalohen.
“Izraeli nuk do të lejojë një armëpushim pa lirimin e pengjeve tanë. Nëse Hamasi vazhdon refuzimin e tij, do të ketë pasoja shtesë”.
Udhëheqësi i Hamasit, Mahmoud Mardawi, tha në një deklaratë të dielën se “rruga e vetme drejt stabilitetit rajonal dhe kthimit të të burgosurve është zbatimi i plotë i marrëveshjes, duke filluar nga faza e dytë”. Hamasi dëshiron që faza e dytë të përfshijë negociatat për një armëpushim të përhershëm, një tërheqje të plotë të trupave izraelite nga Gaza, rindërtimin e enklavës, “dhe më pas lirimin e të burgosurve si pjesë e një marrëveshjeje të rënë dakord”, tha Mardawi.
