Ish-Drejtori i Arkivit në Ministrinë e Brendshme, Kastriot Dervishi, ka publikuar disa telegrame të datës 7 shkurt 1991, në formën e propagandës për të mos lejuar rrëzimin e komunizmit në Shqipëri.
Përmes një shënimi në Facebook, Dervishi thekson se telegrame kishte edhe për rivendosjen e shtatores së Enver Hoxhës në Tiranë dhe qytete të tjera.
“Më 18 shkurt 1991 filloi greva e urisë dhe pas dy ditësh u shemb shtatorja e diktatorit në qendër të kryeqytetit. Para datës 20 shkurt janë dërguar në Presidiumin e Kuvendit Popullor qindra telegrame në mbrojtje të figurës së diktatorit. Këto telegrame të frymëzuara nga Komitetet e PPSH-së në rrethe, janë pasqyrimi më i mirë i ndryshkut enverist që krijoi “njeriu i ri”,-citohet nga komenti i tij në Facebook.
Shënimi i plotë:
Telegramet enveriste të shkurtit 1991
Më 7 shkurt 1991 u nënshkrua peticioni për heqjen e emrit të diktatorit nga Universiteti i Tiranës. Më 18 shkurt 1991 filloi greva e urisë dhe pas dy ditësh u shemb shtatorja e diktatorit në qendër të kryeqytetit. Para datës 20 shkurt janë dërguar në Presidiumin e Kuvendit Popullor qindra telegrame në mbrojtje të figurës së diktatorit. Këto telegrame të frymëzuara nga Komitetet e PPSH-së në rrethe, janë pasqyrimi më i mirë i ndryshkut enverist që krijoi “njeriu i ri”. Bie në sy fakti se është Shqipëria periferike e provinciale që udhëheq me telegrame.
Pas datës 20 shkurt vijojnë telegramet për të rivendosur shtatoret e E.Hoxhës në qytetet e Shqipërisë.
