Situata në Maqedoninë e Veriut vijon të mbetet e paqartë, ndërsa pas mbledhjes së Këshillit të Përgjithshëm, BDI ka autorizuar kreun e partisë Ali Ahmeti për të vazhduar negociatat me aktorët politik në vend me qëllim gjetjen e zgjidhjes për dalje nga kriza politike.
“Kryetari Ahmeti do të flasë me të gjitha partitë politike në dy blloqet, përveç partive destruktive të cilat janë qartazi të përcaktuara me programet e tyre kundër përcaktimeve strategjike të vendit tonë dhe qytetarëve”, tha Bujar Osmani, Zëdhënës i BDI-së.
Sikurse është bërë e ditur zyrtarisht, negociatat do të zhvillohen me parti politike në dy blloqet, ndërsa mbeten të hapura të gjith opsionet, madje edhe zgjedhjet e parakohshme parlamentare ose mbetja në opozitë.
“Të gjitha opsionet janë të mundshme, përveç kombinimeve të cilat janë në kundërshtim me interesat strategjike”, shtoi Osmani.
Para takimit kreu i partisë Ali Ahmeti hodhi poshtë zërat se deputet të partisë së tij janë në negociata për t’iu bashkuar shumicës së deklaruar nga Hristijan Mickoski./Opinion.al
