Tre pjesëtarë Policisë së Kosovës janë lënduar ditën e sotme gjatë një aksioni në veri të Kosovës.
Ky lajm është bërë i ditur nga ministri i Brendshëm i Kosovës, Xhelal Sveçla, përmes një postimi në rrjetet sociale.
Sveçla njofton se koha e bandave kriminale në veriun e Kosovës ka përfunduar.
Ai shkruan në Facebook se në këtë aksion është arrestuar një nga organizatorët e sulmeve ndaj pjesëtarëve të KFOR-it.
Sipas Sveçlës, i arrestuari I ditës së sotme është I njëjti person që ka organizuar sulmet ndaj forcave të KFOR-it dhe Policisë së Kosovës në Zveçan para dy javësh.
“Arrestohet një nga organizatorët e sulmeve ndaj pjesëtarëve të KFOR-it. Policia e Kosovës sot ka arrestuar Milun Milenkovic- Llune, një nga udhëheqësit e formacionit kriminal “Mbrojtja Civile” dhe prijësin e bandave kriminale që ndër vite kanë terrorizuar qytetarët tanë, kanë sulmuar pjesëtarët e Policisë së Kosovës dhe institucionet e Republikës së Kosovës. I njejti ka qenë edhe organizatori kryesor i sulmeve ndaj forcave të KFOR-it dhe Policisë së Kosovës në Zveçan.
Gjatë arrestimit të tij, janë sulmuar zyrtarët e Policisë së Kosovës me ç’rast tre nga ta janë të lënduar lehtë. Siç edhe e kam theksuar në vazhdimësi, koha e bandave kriminale në veriun e vendit tonë ka përfunduar. Të gjithë individët apo grupet kriminale që kanë cënuar sigurinë dhe rendin kushtetues të Republikës së Kosovës, do të përballen me drejtësinë. Republika nuk do të zmbrapset”, shkroi Sveçla në Facebook./Opinion.al
