Këtë mërkurë ekipet negociatore të Kosovës dhe Serbisë priten të takohen në Bruksel, pas situatës së krijuar në veri të Kosovës lidhur me reciprocitetin e targave.
Takimi do të zhvillohet mes zëvendëskryeministrit Besnik Bislmi njëherësh shef i ekipit negociator kosovar dhe shefit negociator serb Petar Petkoviç.
Lajmi është konfirmuar për Klan Kosova nga zyrtari i Lartë për Informim për Politikë të Jashtme në Bashkimin Europian, Peter Stano.
Përfaqësuesi i Lartë i Bashkimit Euopian për Politikë të Jashtme dhe Siguri, Josep Borrell, ka përsëritur të dielën thirrjen drejt palëve që të punojnë në zbutjen e tensioneve në veri të Kosovës dhe është shprehur se, një hap i parë në këtë drejtim do të ishte shkuarja e kryenegociatorëve në Bruksel.
Po ashtu, të njëjtën thirrje ka bërë edhe sekretari i Përgjithshëm i NATO-s, Jens Stoltenberg pas bisedës që zhvilloi me kryeministrin Albin Kurti, dhe presidentin serb Aleksandar Vuçiç./ Opinion.al
