Ministria e Shëndetësisë ka deklaruar sot se në dy spitalet COVID aktualisht po marrin shërbim 33 pacientë.
Konkretisht, në shërbimin Infektiv aktualisht janë të shtruar 27 persona , 6 nga të cilët në terapi intensive.
Në totalin e të shtruarve në Infektiv, ndodhen edhe 3 raste të importuara. Ministria sqaron se bëhet fjalë për ushtarë shqiptarë të KFOR të ardhur nga Kosova.
Po ashtu, njoftohet se aktualisht në spitalin COVID 2 “Shefqet Ndroqi”, i cili ndjek rastet e rënda me insufiçencë respiratore covid pozitiv, janë 6 pacientë të shtruar, 2 prej të cilëve janë në terapi intensive, në gjendje më të rënduar.
Sipas Ministrisë, aktualisht në vendin tonë, nga 281 pacientë aktivë, vetëm 10% po trajtohen në dy spitalet COVID ndërsa rreth 90% e tyre janë në vetëizolim me simptoma të lehta ose janë pa simptoma dhe monitorohen në mënyrën sistematike nga mjeku i familjes.
Sakaq, 16 raste të reja me Covid-19 u zbuluan në 24 orët e fundit. Deri në këto momente në Shqipëri raportohen 766 persona të prekur me virusin e ri, ndërkohë që 30 prej tyre kanë humbur jetën./Opinion.al
