Në një kohë kur Prishtina dhe Beogradi po kërkojnë gjuhën e dialogut, për Presidentin e Kosovës Hashim Thaçi, psotesta dhe bllokimi i rrugëve nuk ndihmon. Ndonëse shkruan se e kupton që plagët e luftës janë ende të freskëta, Thaçi shkruan ndër të tjera se “ne duhet të ngrihemi mbi vetveten, mbi plagët dhe dhimbjet e shumta”.
Thaçi ka reaguar pas anulimit të vizitës së presidentit serb në Kosovë ,me një vendim të Kryeministrit Haradinaj, që në fakt erdhi pas protestës së qytetarëve të Drenicës, për të mos lejuar kalimin e tij në Skënderaj dhe Banjë, ku do të takohej me komunitetin serb.
Ky vendim shkaktoi reagim edhe terk autoritetet serbe, ndërkohë që mësohet se vizitën e parealizuar në Banjë, Vuçiç do ta zëvendësojë me një takim me serbët e Veriut.
Postimi i Thaçit
Qeveria e Republikës së Kosovës, ditë më parë kishte miratuar kërkesën për vizitën e Presidentit të Serbisë në Kosovë, duke përfshirë itinerarin e saktë.
Por, për shkak të rrethanave të reja të krijuara dhe ruajtjes së sigurisë së qytetarëve dhe të vetë delegacionit të presidentit serb, sot Qeveria e Kosovës ka marrë vendim për anulimin e vizitës së tij në fshatin Banje.
Si President i Kosovës, e mirëkuptoj plotësisht reagimin e qytetarëve të Drenicës, të cilët kanë shprehur revolten e tyre të arsyeshme kundër një vizite të tillë. Kjo tregon se plagët e dhimbjes dhe luftës janë ende shumë të freskëta.
Megjithatë, në kohën kur jemi duke bërë përpjekje për paqe dhe pajtim, protestat dhe bllokimi i rrugëve, aspak nuk na ndihmojnë.
Prandaj, unë e kuptoj edhe zhgënjimin e banorëve të komunitetit serb në fshatin Banje, për pamundësinë e realizimit të kësaj vizite.
Të gjithë duhet të përmbahemi dhe të tregojmë kulturë minimale njerëzore të mirëkuptimit dhe komunikimit njerëzor.
Ne duhet të dimë të ngrihemi mbi vetveten, mbi plagët dhe dhimbjet e shumta. Duhet ta bëjmë këtë për hir të paqes dhe pajtimit. HTH
Postimi i Haradinajt
Siguria e qytetarëve është mbi të gjitha. Kam tërhjekur lejen e dhënë nga Ministria e Punëve të Jashtme për vizitë të Presidentit Serb në zonën e Drenicës. Ky vendim hyn në fuqi menjëherë.
RH
