Kryeministri Edi Rama ka dalë në një konferencë për mediat, këtë të enjte, ku është ndalur te situata në Veriun e Kosovës.
Gjatë fjalës së tij, Rama tha se është i shqetësuar për atë ç’ka po ndodh në Veri ndërsa bëri me dije se i ka dërguar një draft-propozim, të hartuar nga ekspertë të nivelit të lartë amerikan dhe europian, Presidentit francez Emanuel Macron dhe Kancelarit gjerman Scholz, për krijimin e Asosacionit të Komunave me shumicë serbe.
“Dje i kam përcjellë Presidentit Macron dhe Kancelarit Scholz një draft të asociacionit për të cilin kam vënë në dijeni dhe Presidentin e KE dhe palën amerikane. Është një draft i punuar nga ekspertë të nivelit më të lartë amerikanë dhe europianë prej kohësh gjë që është bërë pikërisht në rast se do të vinte kjo ditë. Kjo ditë kur palët dhe në këtë rast për mua i pakuptueshëm është pozicioni i Kosovës jo i Serbisë, palët nuk po merren dot vesh se kush do ta shkruajë këtë tekst. Natyrisht ky është një dokument konfidencial i cili padiskutim nuk pretendon të jetë zgjidhja ideale por ju siguroj që është një dokument i i nivelit më të lartë ndërkombëtar që merr në konsideratë të gjitha arsyet për krijimin e asociacionit dhe patjetër se asociacioni është pjesë e organizimit të jetë në Republikën e Kosovës.
Uroj dhe shpresoj që ky material të vlejë për të çuar në një tjetër nivel dialogun dhe t’i bëjë palët që të flasin për gjëra konkrete dhe jo që të flasin me vete dhe për vete. Arsyeja pse e ndaj sot është sepse situata po bëhet alarmante dhe unë nuk mund të qëndroj spektator duke parë Kosovën si tkurret në sytë e atyre që e krijuan shtetin e Kosovës”-tha Rama./Opinion.al
