Ministrat e jashtëm të BE-së do të mbajnë të martën një takim urgjent për të diskutuar zhvillimet e fundit në Izrael dhe Rripin e Gazës, njoftoi të hënën shefi i politikës së jashtme të bllokut.
Përmes një postimi në rrjete sociale, Josep Borrell tha se ai “do të mbajë nesër një takim urgjent të ministrave të jashtëm të BE-së për të trajtuar situatën në Izrael dhe rajon”.
Mbledhja do të konsiderohet si një “takim joformal urgjent” pasi Borrell dhe një numër diplomatësh të lartë të BE-së do të jenë në kryeqytetin e Omanit, Muscat, ndërsa ministrat e tjerë të jashtëm do t’i bashkohen atyre online, tha zëdhënësi kryesor i Komisionit Evropian për çështjet e jashtme, Peter Stano.
Borrell ka mbërritur tashmë në Muscat për të marrë pjesë në takimin ministror të Këshillit të Bashkëpunimit BE-Gjirit, shtoi ai.
Borrell dhe zyrtarë të lartë të BE-së, përfshirë presidentin e Këshillit Evropian Charles Michel dhe Presidenten e Komisionit Evropian Ursula von der Leyen, dënuan “në termat më të fortë të mundshëm sulmet e shumta dhe pa dallim në të gjithë Izraelin nga Hamasi” gjatë fundjavës.
Ai foli gjithashtu me kryeministrin palestinez Mohammad Shtayyeh për t’i kërkuar “Autoritetit Palestinez të kontribuojë në ndërprerjen e menjëhershme të armiqësive, të promovojë interesin e popullit palestinez dhe aspiratën e të gjithë rajonit për siguri dhe stabilitet”.
Grupi i rezistencës me bazë në Gaza, Hamasi, nisi operacionin Al-Aksa Flood kundër Izraelit herët të shtunën, duke lëshuar një breshëri raketash. Ai tha se sulmi i befasishëm ishte në përgjigje të sulmit ndaj Xhamisë Al-Aksa në Jerusalemin Lindor të pushtuar dhe rritjes së dhunës së kolonëve izraelitë.
Si hakmarrje, ushtria izraelite nisi operacionin kundër Hamasit në Rripin e Gazës.
Të paktën 700 izraelitë janë vrarë deri më tani dhe mbi 2,300 të tjerë janë plagosur në luftime, sipas Ministrisë izraelite të Shëndetësisë.
Ndërkohë ministria palestineze e Shëndetësisë tha se rreth 500 palestinezë janë vrarë dhe mbi 2700 janë plagosur./Opinion.al
I am convening tomorrow an emergency meeting of EU Foreign Ministers to address the situation in #Israel and in the region.
— Josep Borrell Fontelles (@JosepBorrellF) October 9, 2023
