Çmimet e naftës vijojnë të mbeten të paqëndrueshme për shkak të frikës se kriza Izrael-Iran mund të shndërrohet në një konflikt më të gjerë që përfshin edhe Shtetet e Bashkuara.
Nafta e papërpunuar Brent ra me 35 cent, ose 0.5%, në 76.10 dollarë për fuçi, ndërsa në bursën amerikane ra me 23 cent, ose 0.3%, në 74.61 dollarë për fuçi. Frika, sipas ekspertëve, është rritur mes mundësisë për ndërprerje të furnizimit nga konflikti Iran-Izrael dhe një vendimi t
Rezervës Federale të SHBA-së për normat e interesit që mund të ndikojë në kërkesën për naftë.
Analistët shprehen se janë rritur shqetësimet për ndërprerjet e furnizimit në Ngushticën e Hormuzit, ku transportohet një e pesta e naftës në botë. Izraeli ka bombarduar disa objekte nafte dhe gazi në Iran që nga e premtja e kaluar, duke përfshirë fushën e gazit South Pars, uzinën e gazit Fajr Jam, depon e naftës Shahran dhe rafinerinë e naftës Shahr Rey.
Ndërkohë që deri më tani ka pasur pak ndërprerje në rrjedhat globale të energjisë, mundësia e përshkallëzimit, duke përfshirë përfshirjen e drejtpërdrejtë të SHBA-së në ofensivën ushtarake të Izraelit, i ka vënë tregjet në rrezik.
Pothuajse të gjitha eksportet e naftës së Iranit kalojnë nëpërmjet terminalit të eksportit të ishullit Kharg, i cili deri më tani është kursyer nga bombardimet izraelite. “Një ndërprerje në infrastrukturën e prodhimit ose eksportit të Iranit do të shtonte më shumë presion mbi çmimet”, thanë analistët.
Tregjet po presin gjithashtu ditën e dytë të diskutimeve të Rezervës Federale të SHBA-së, në të cilën banka qendrore pritet ta lërë normën e saj të interesit bazë në rangun prej 4.25% deri në 4.50%.
Megjithatë, konflikti në Lindjen e Mesme dhe rreziku i ngadalësimit të rritjes globale mund ta shtyjnë Rezervën Federale të ulë normat e interesit me 25 pikë bazë në korrik, më shpejt se pritshmëritë aktuale të tregut. Klan News
