Ministri i Mbrojtjes Niko Peleshi ka reaguar ditën e sotme për situatën e zjarreve në vend.
Përmes një postimi në rrjete sociale, Peleshi sqaron se Forcat e Armatosura kanë bërë të mundur shuarjen e vatrave aktive në fshatin Delbnisht, Kurbin, në Laç si dhe është duke vijuar puna në Tepelenë si edhe në fshatin Grazhdan.
Ai therkson se në fshatin Treblovë, në bashkinë e Selenicës të qarkut Vlorë, falë ndërhyrjes në kohë me helikopter u bë e mundur shpëtimi i 4 shtëpive.
Peleshi njofton se po punohet me intensitet për mbajtjen nën kontroll të vatrave të zjarrit në fshatin Jarua si dhe në fshatin Sinanaj, në bashkinë Tepelenë.
“Forcat e Armatosura, nën koordinimin e Agjencisë së Mbrojtjes Civile, gjatë ditës së sotme kanë bërë të mundur shuarjen përfundimtare të vatrave aktive të zjarrit në fshatin Delbnisht, në Njësinë Administrative Milot, bashkia Kurbin. Në kurorën e qytetit të Laçit, afër Kishës së Shën Antonit, aty ku situata ishte tejet kritike qe prej ditës së djeshme, vatrat e zjarrit janë shuar përfundimisht.
Momentalisht, situata është e qetë dhe po monitorihet nga punonjësit e zjarrfikëses dhe shërbimit pyjor. Gjithashtu është bërë e mundur shuarja e një vatre zjarri pranë superstradës Milot-Lezhë. Në fshatin Treblovë, në bashkinë e Selenicës të qarkut Vlorë, zjarri është arritur të shuhet plotësisht. Fal ndërhyrjes në kohë me helikopter u bë e mundur shpëtimi i 4 shtëpive.
Po punohet me intensitet për mbajtjen nën kontroll të vatrave të zjarrit në fshatin Jarua, bashkia Fier ku është shmangur rreziku për banesat.
Në fshatin Sinanaj, në bashkinë Tepelenë, punohet nga terreni për izolimin e vatrës së zjarrit. Puna vijon edhe në fshatin Grazhdan, në bashkinë e Finiqit për normalizimin e vatrës pas riaktivizimit”, tha Peleshi./Opinion.al
