Thëllënza Langa nga Çerma e Lushnjes, prej 10 vitesh vuan me diabet dhe duhet të bëjë analizat dy herë në vit në laboratorin e poliklinikës Lushnje. Për këto kontrolle i duhet që të marrë kodin nga sistemi që nxjerr mjeku i familjes. Por ajo thotë në emisionin “Stop” në Tv Klan se prej kohësh, mjeku Thoma Biti nuk po e pajis me kod ndaj nuk po bën dot analizat.
Mjeku i familjes thotë se nuk ka mundur të kapë linjën në sistem sepse sa e kanë hapur, e kanë mbyllur sërish.
Mjeku i familjes Thoma Biti: Për ditë të premte hapet, por siç futem unë, futen të gjithë!
Gazetarja: Në sistem po thua?
Mjeku i familjes Thoma Biti: Në sistem pra, në sistem po flasim, në kompjuter dhe unë s’arrij dot të bëj një. Të premten, aty për shembull, aty 2 minuta, 5 minuta dhe zhduket, unë si pleqëri s’e arrij dot, s’kap asnjë! Dhe të tjerët që ashtu 5 minuta rri hapur se mbyllet komplet pastaj, mbaruam të gjithë. Pyet dhe mjekë të tjerë! Ku je, në Lushnjë? Pyet mjekë të tjerë atje!
Gazetarja pyet edhe mjekë të tjerë, disa prej të cilëve e kishin kapur për pak momente sistemin e të tjerë jo sepse fondet për të hapur kodet janë të limituara dhe në ato pak minuta nuk ishte e mundur që të mbuloheshin të gjithë pacientët.
Mjekja e familjes: Përshëndetje!
Gazetarja: Përshëndetje! Mjek familjeje keni këtu?
Mjekja e familjes: Unë jam!
Gazetarja: Keni pasur sistem?
Mjekja e familjes: Vjen vetëm një herë në javë.
Gazetarja: Po sa zgjat, kush e përcakton atë fashën orare, sa kohë rri sistemi?
Mjekja e familjes: Kërkoje tek Drejtori i Spitalit, te specialisti i IT-së, bëhet një buxhet për të gjithë këto. Është një fond i përcaktuar për pjesën e analizave. Në bazë të atij fondi përcaktohen, me një fjalë për këtë javë hapen kaq, edhe ne punojmë! Jo të gjithë zgjidhen, por pacientët problematikë ia kemi zgjidhur! Jo 100% e pacientëve mund të zgjidhet me këtë formë, që është e planifikuar nga…
Gazetarja: Kjo rrezik është te…
Mjekja e familjes: Është tek 1%.
“Stop” kontakton drejtorin e NJVKSH, Denis Korreshin.
Denis Korreshi: Unë këtë problematikë nuk e di! Ma shkruaj diku që ta ndjek dhe të kthej një përgjigjie!
Gazetarja: S’po e kupton arsyen e telefonatës sime. Unë dua interesim për rastin. Unë dua që ti si titullar të vësh në dijeni drejtorin e spitalit, kush është përgjegjës për këto sistemet, të hapë sistemin që ai mjek Thomai i Çermës të hapë sistemin, t’i japë zonjës kodin dhe zonja meqenëse ka bërë rrugë disa herë këtë javë nga Çerma në Lushnje, të paktën të bëjë analizat në laborator. A mund ta bëjmë këtë gjë sot?
Denis Korreshi: Të komunikoj edhe po ju telefonoj mbrapsht!
Pas komunikimit me Denis Korreshin i cili kontaktoi drejtorin e spitalit dhe polilinikës në Lushnje, Roland Ziun.
Denis Korreshi: Të drejtohet tek mjeku dhe e ka zgjidhjen tek mjeku po të them! Është zgjidhur situata.
Pas interesimit të emisionit “Stop”, Thëllënza drejtohet te laboratori i spitalit ku ajo bën menjëherë analizat./tvklan.al
