Ministria e Mbrojtjes ka informuar rreth situatës së zjarreve në vend për 24 orët e fundit.
Drejtori i Gatishmërisë dhe Përgjegjës ndaj emergjencave pranë Agjencisë Kombëtare të Mbrojtjes Civile, Robert Hysenllari ka bërë me dije se gjatë 24 orëve të fundit janë regjistruar 19 vatra zjarri, prej të cilave janë shuar 13 ndërsa 6 vazhdojnë të jenë ende aktive.
Bëhet me dije se aktualisht janë aktive vatrat në Bashkinë Shkodër, në vendin e quajtur “Maja e Zorgjit” në fshatin Ndërlysaj, i cili vijon prej 3 ditësh dhe zjarri në bashkinë Mat, në fshatin German, i cili është aktivizuar që prej datës 1 të muajit Gusht. Në bashkinë Durrës vijon zjarri i rënë me datë 19 korrik në fshatin Shetaj, ndërsa në bashkinë Kurbin vijojnë aktive vatrat në fshatin Skuraj dhe Malin e Bardhë, intesiteti i të cilave është i ulët. Po ashtu, mbeten aktive vatrat në fshatin Bulshat të bashkisë Mirditë, dhe në fshatin Rehove te Bashkise Polican.
Në operacionet e shuarjes së vatrave të zjarrit gjatë 24 orëve të fundit janë angazhuar 342 forca operacionale, të Sherbimit te Mbrojtjes nga Zjarri dhe Shpëtimi , Forca të Armatosura, forca bashkiake, forca policore, punonjës të Administratës së Zonave të Mbrojtura, shërbimi pyjor, forca vullnetare dhe jane angazhuar 35 mjete zjarrfikëse./Opinion.al
