Një helikopter i ushtrisë ruse është rrëzuar sot në provincën Idlib të Sirisë, duke lënë të vdekur pesë persona sa ishin në bord.
Provinca Iblid është nën kontrollin e rebelëve sirianë, ndërkaq autoritetet ruse kanë thënë se humbja e pesë personave sot është humbja më e madhe që kur ky shtet ka filluar sulmet ajrore në Siri, shkruan Reuters, transmeton express.
Në pamjet e publikuara nëpër rrjetet sociale shihet se si njerëzit vjedhin çdo gjë që gjejnë në vendin ku është rrëzuar helikopteri. Madje, njërit prej të vdekurve i hiqen rrobat, ndërkaq edhe dokumentet e identitetit të gjithë personave që ishin në bord të helikopterit u janë marrë.
Ministria e Mbrotjes e Rusisë ka njoftuar se helikopteri Mi-8 kishte transportuar ndihmë humanitare në qytetin Aleppo dhe në rrugën e kthimit është qëlluar dhe rrëzuar.
“Informacionet që kanë arritur në ministrinë tonë thonë se të gjithë personat në bord kanë vdekur, kanë vdekur në mënyrë heroike”, ka thënë zëdhënësi i Kremlinit Dmitry Peskov.
Deri më tani askush nuk ka marr përgjegjësinë për këtë sulm. Luftëtarët e Shtetit Islamik nuk janë shumë aktiv në këtë zonë por grupe të tjera të ekstremistëve islamikë gjenden në këtë zonë.
