Trajneri i Bayern-it, Carlo Ancelotti, ka nisur një aventurë të re te kampionët e Gjermanisë, por shpesh “ngacmohet” nga gazetarët për punët e tij të mëparshme, si për shembull te Real Madridi. Në një intervistë të fundit, italiani është pyetur për suksesin e teknikut aktual të “Galaktikëve”, Zinedine Zidane, i cili fitoi Ligën e Kampionëve me “Los Blancos” që pas pak muajsh nga marrja e detyrës, si dhe për largimin e tij nga Madridi tre sezone më parë me urdhër të presidentit Florentino Perez.
“Ç’më tha Perez kur më hoqi? Kjo është personale, por ai ishte shumë i sinqertë me mua. Nuk dua të flas për këtë. Kur erdha në Madrid, e dija se një ditë do të largohesha. Për një trajner, përvoja e punës te Real Madridi është unike dhe për këtë më duhet të falenderoj Florentinon. Ai firmosi me mua dhe ne fituam “La Decima”-n. Disa kohë më parë kam mësuar se të lihesh i lirë për t’u larguar është pjesë e punës. Kam kujtime të mira nga Madridi, që nga presidenti e deri te njerëzit me të cilët kemi punuar”, – përfundoi strategu aktual i bavarezëve.
