Shëndeti mendor është jashtëzakonisht I rëndësishëm, pasi ndikon në çdo aspekt të jetës sonë, mënyrën si mendojmë, sillemi, ndjejmë dhe marrim vendime.
Ekspertët thonë se duhet ta trajtojmë me seriozitet çdo fjalë të thënë edhe ashtu kot, nga njerëzit tanë të dashur dhe personat që na rrethojnë, kur bëhet fjalë për çështjet e shëndetit mendor.
“Ne duhet të shqetësohemi kur një person ka qenë shumë aktiv dhe papritur fillon të mbyllet në vetvete. Ka qenë një person që merrte pjesë në të gjitha aktivitetet që i ofroheshin nga miqësia, shoqëria, familja, dhe papritur fillon të neglizhojë, të tërhiqet duke përdorur lloj-lloj arsyesh. Një tregues tjetër është çrregullimi i gjumit. Fillojnë të bëjnë gjumë të parehatshëm. Këtu përfshihen edhe personat që vijnë tek ne dhe referojnë, se shohin ëndrra të frikshme. Pikërisht këto makthe janë zanafilla e çrregullimit të ankthit.
Ka persona që më parë kanë punuar me energji dhe motivim të madh, por papritur fillojnë të tërhiqen apo të krijojnë mendime se aty dikush po i keqtrajton, se dikush po i mbingarkon, pra po u cakton rëndesë më të madhe pune, sesa ajo që iu takon në të vërtetë. Dhe në këto momente mund të themi se kemi të bëjmë me zanafillën e çrregullimit të ankthit, apo zanafillën e një episodi depresiv.
Nuk duhet harruar, dhe duhet theksuar me të madhe që një person, i cili në një moment të caktuar të jetës, pohon se unë më mirë të kisha vdekur, sesa të jetoj, kjo duhet të shërbejë si një thirrje alarmi. Edhe e thënë kot, duhet vlerësuar, dhe ky person duhet të inkurajohet që të shkojë dhe të kërkojë ndihmën e profesionistëve të shëndetit mendor”, tha Valentina Asabella, Mjeke psikiatre.
