Një sëmundje misterioze që ka prekur diplomatët amerikanë vitet e fundit është lidhur me një njësi të inteligjencës ruse.
Personeli i stacionuar anembanë globit me “Sindromin Havana” ka raportuar simptoma të pashpjegueshme si marramendje.
Ata mund të jenë shënjestruar nga armët zanore ruse, sipas një hetimi të përbashkët nga The Insider, Der Spiegel dhe 60 Minutes të CBS.
Moska i ka mohuar akuzat. Zyrtarët amerikanë thanë më parë se nuk kishte gjasa që një fuqi e huaj të ishte fajtore.
Por në vlerësimin e tyre për “incidentet anormale shëndetësore”, të bëra vitin e kaluar ata nuk dhanë asnjë shpjegim alternativ, duke i frustruar ata që janë prekur.
Fenomeni e ka marrë emrin nga kryeqyteti i Kubës, Havana ku rasti i parë u zbulua në vitin 2016, megjithëse raporti i ri sugjeron se rastet e para mund të kenë ndodhur në Gjermani dy vjet më parë.
Personeli amerikan i goditur nga kjo gjendje përfshirë Shtëpinë e Bardhë, CIA dhe stafin e FBI-së, janë ankuar për marramendje, dhimbje koke, vështirësi në përqendrim dhe një tingull intensiv dhe të dhimbshëm në veshët e tyre.
Janë bërë më shumë se 1000 raporte për sëmundjen misterioze, me dhjetëra raste që ende zyrtarisht konsiderohen të pashpjegueshme.
Ligjvënësit amerikanë kanë miratuar legjislacionin që synon mbështetjen e viktimave dhe njerëzit me lëndime të konfirmuara të trurit nga sëmundja kanë të drejtë për pagesa.
Prej kohësh ekziston dyshimi se të prekurit janë goditur nga energjia e drejtuar ose mikrovalët e shkrepura nga pajisjet e fshehura, një mundësi që u pranua në një raport të mëparshëm të inteligjencës amerikane.
Hetimi i medias së re pretendon se operativë nga një njësi e inteligjencës ushtarake ruse, e njohur si 29155, mund të kenë shënjestruar trurin e diplomatëve amerikanë me armë “energji të drejtuar”.
Si pjesë e hetimit, The Insider gjithashtu raportoi se oficerët në njësinë 29155 ishin shpërblyer për punën e tyre në lidhje me zhvillimin e “armëve akustike jo-vdekjeprurëse”.
Një hetues ushtarak amerikan që ekzaminonte raste të sindromës tha për 60 Minutes se lidhja e përbashkët mes viktimave të sindromës ishte një “lidhje e Rusisë”.
Zëdhënësi i Kremlinit Dmitry Peskov mohoi se kishte ndonjë provë për përfshirjen ruse dhe tha se akuzat në raport ishin të pabaza.
Duke iu përgjigjur raportit, zyrtarët amerikanë i thanë CBS News, partnerit amerikan të BBC-së, se ata do të “vazhdonin të shqyrtonin nga afër incidentet anormale shëndetësore”./Opinion.al
