Të dielën pritet të ndryshojë ora, ku akrepat do të zhvendosen 60 minuta përpara duke bërë që njerëzit të flenë një orë më pak gjumë. Ky ndryshim mund të ndikojë për keq tek personat që vuajnë nga demenca dhe sipas një eksperti, ata priren të përballen me probleme për shkak të këtij shqetësimi.
Lidhur me këtë problematikë, Lee Cartwright ofron një zgjidhje efektive, teksa orienton individët që kujdesen për këta persona me demencë, përpara se të ndodhë ndryshimi i orës.
“Demenca njihet për shkaktimin e dëmtimeve të aftësive konjitive si kujtesa dhe ndryshimi i orës duke sjellë një ditë më të zgjatur dhe një gjumë më të pakët, mund të ndryshojë tërësisht orarin me të cilin këta persona janë mësuar ti drejtohen shtratit. Në këtë mënyrë, ata e kanë akoma më të vështirë për të ruajtur një regjim të shëndetshëm gjumi”, shpjegon Cartwright.
Eksperti tregon dhe efektet që sjell kjo sëmundje, e cila mund t’i pengojë ata nëse nuk marrin udhëzimin e duhur pas ndërrimit të orës, në mesnatën e së dielës.
“Demenca sjell efekte si ankth më të shtuar, mungesë humori, mungesë për t’i mbajtur mend gjërat dhe njerëzit. Megjithatë, për fat të mirë, ka disa mënyra se si ata që kujdesen për këta persona, duke përfshirë anëtarë të familjes ose miq të afërm, për të shmangur këto situata”, shtoi më tej eksperti.
Si mund ta dalloni kur dikush ka demencë?
Sipas Lee, për të kuptuar nëse dikush ka shenja të demencës dhe duhet të reagoni menjëherë për ti ardhur në ndihmë, këto “sinjale” mund t’iu hyjnë në ndihmë.
Mungesë përqëndrimi
Ndryshimi i orës mund të bëjë që këta persona të mos dinë orarin e duhur për të flejtur gjumë. Nuk dinë të identifikojnë se çfarë dite është sot, ku ata ndodhen, diçka që bëhet e bezdishme për ta.
Ndërpritja e gjumit
Një orë më shumë ose një orë më pak. Dallimi është shumë i madh për ata që vuajnë nga demenca, duke bërë që ta kenë akoma më të vështirë se kur ata duhet të flenë, ose në rastet kur ndjejnë lodhje të tepërt gjatë pjesës më të madhe të ditës. Kjo sjell konfuzion dhe mungesë qartësie për çdo veprim pasues.
Vështirësi për të mbajtur një rutinë të qëndrueshme
Ata që vuajnë nga demenca, kryesisht bazohen tek një rutinë e sigurtë, duke bërë që dhe ndryshimet më të vogla, si zhvendosja e orës një orë përpara, mund ti bëjë ata ta humbasin këtë siguri. Për ta merr shumë kohë që të përshtaten me këtë realitet të ri dhe mund ti bëjë të ndihen nervozë ose me nivel të ulët humori.
Vështirësi në dallimin e kohës
Lindja dhe perëndimi i diellit mund të kthehet në problem për personat me demencë, pasi kjo sjell humbje të ekuilibrit lidhur me ndryshimin e kohës dhe paaftësi për të kuptuar nëse është ditë apo natë dhe kjo mund të përkeqësojë sjelljen e tyre duke shkaktuar shqetësime, nervozizëm, agresion, refuzim për të bashkëpunuar, dëgjojnë ose shohin gjëra që s’janë aty dhe shpërthime të ndryshme emocionale.
Si mund të përgatiten këto persona që t’i shmangin këto “incidente”?
Në mënyrë që gjithçka të jetë nën kontroll, Lee sugjeron të gjithë personat që u gjenden pranë individëve që vuajnë nga kjo sëmundje të ndjekin këto hapa, përpara se të ndodhë ky ndryshim i orës.
Ndryshojini rutinën
Përgatitni darkën dhe çojeni drejt shtratit, mundësisht një orë para. Në këtë mënyrë ata do ndihen më të qetë dhe do të marrin sasinë e nevojshme të gjumit për të pushuar. Mundohuni të jeni sa më të qetë në këto veprime sepse ndryshimi mund të jetë disi ç’orientues dhe u ofroni atyre siguri nëse duken sadopak të hutuar.
Krijoni një agjendë të vazhdueshme
Kjo e ndihmon trupin të fitojë qetësinë e duhur. Një shembull që mund t’iu jap: Dilni një shëtitje në mëngjes pasi të keni konsumuar vaktin. Kjo mund ta bëjë akoma më të lehtë që ata të njihen me rëndësinë e ditës dhe të përshtaten me kohën e jashtme.
Një mjedis më i qetë në dhomën e gjumit
Në mjedis i qetë gjumi mund të jetë vendimtar për ta. Dhe nëse koha është me diell dhe drita është e fortë, përdorni perdet për t’u lehtësuar atyre procesin e gjumit. Dhe për të mos harruar, kufizoni orët e gjumit gjatë ditës.
Eliminoni përdorimin e kafes dhe sheqernave
Kafeina, sheqernat, ëmbëlsirat dhe alkooli janë faktorë që nxisin vonimin e gjumit, duke vështirësuar aftësinë e trurit për të rënë në gjumë. Të shmangen së paku disa orë.
