Silvio Berluskoni, presidenti më i suksesshëm i historisë së futbollit ka festuar dje ditëlindjen, teksa mbushi plot 80 vjeç. Një personalitet që ka ditur të ndryshojë historinë e këtij klubi për 30 vjet. Ky përvjetor vjen ndoshta në momentin më të vështirë të klubit kuqezi, i cili shumë shpejt do të shkojë në duart e investitorëve të tjerë. Megjithatë, askush nuk e harron atë çfarë bëri Silvio në 30 vitet e qëndrimit të tij te Milan
Historia e Berluskonit në krye të kuqezinjve nisi më 20 shkurt të vitit 1986. Në 3 dekadat që pasuan, Milani fitoi 28 tituj me Berluskonin president. Rruga e suksesit nisi me ardhjen e Arigo Sakit dhe treshes holandeze Rajkard, Van Basten, Gulit. Në vitet 1989 e 1990 u fituan Kupa e Kampioneve, Superkupa Europiane, Kupa Interkontinentale dhe Superkupa e Italisë. Pas kalimit të Sakit në kombëtaren italiane, në stol u ul Fabio Kapelo, që e bëri akoma më të madh Milanin. Në 5 vitet e qëndrimit të tij, kuqezinjtë fituan 4 tituj të Serisë A, në Ligën e Kampioneve Milani arriti në 3 finale radhazi – në 1993,1994 e 1995 – ku mbahet mend fitorja e madhe 40 ndaj Barcelonës në Athinë.
Për të riparë titullin kampion në muzeun e Milanit u desh të pritej viti 1999, kur në stol ishte Alberto Zakeroni. Pas këtij viti, Milani do të kishte probleme deri në ardhjen e Karlo Ançelotit. Me këtë trajner, Milani ishte një tjetër skuadër, në Itali dhe Europë ku spikasnin emra si Nesta, Maldini, Pirlo, Rui Kosta, Shevçenko apo Inzagi. Në 2003 “Djalli” fitoi Ligën e Kampioneve, ndërsa në 2004 kjo skuadër u shpall kampione e Italisë. Finalja e Stambollit ndaj Liverpulit në 2005 ishte më e tmerrshmja për kuqezinjtë, të cilët ditën të hakmerreshin 2 vjet më vonë ndaj anglezëve duke fituar titullin e shtatë kampion të Europës. Dy sukseset e fundit të epokës Berluskoni u arritën në drejtimin e Masimiliano Alegrit, titulli i Serisë A në vitin 2011 dhe Superkupa e Italisë e fituar ndaj Interit. Në të gjithë kohën e tij si president i Milanit, Silvio Berluskoni ka shpenzuar saktësisht 865 milionë euro.
Nga legjendat te politika, e gjithë bota uron Silvion Futbollistë, drejtues, njerëz të spektaklit, politikanë dhe natyrisht edhe njerëzit e Milanit të tij. Përmes rrjeteve sociale mbërritën urimet për përvjetorin e 80të të Silvio Berluskonit. Skuadra Në mëngjes ishte pikërisht Milani i tij që publikoi në rrjete sociale një video me urimet e skuadrës. Nga trajneri Montela te bomberi Baka dhe kapiteni Montolivo. Pak çaste më vonë erdhën edhe “qirinjtë” e Demetrio Albertinit, një prej lojtarëve më të përfaqësuar të epokës kuqezi të kavalierit: “Shumë urime, shumë fjalë… Faleminderit president!”, shkroi ishmesfushori në “Twitter”.
Ishët e mëdhenj “Dua të falënderoj presidentin për gjithçka ka bërë për mua dhe Milanin. Nëse skuadra ka këtë histori që ka, është pjesa më e madhe merita e tij. Kështu, shumë urime Silvio Berluskonit”, ishte mesazhi i Kakasë nga Toronto. “Shumë urime presidentit, presidentit tim të madh Silvio Berluskoni për 80 vitet e tij”, komentoi ishkapiteni Paolo Maldini. “President, gëzuar datëlindjen, shumë shëndet dhe jetë të gjatë”, shkroi Dejan Saviçeviç. “Për 80 vitet e tij doja t’i uroja shumë lumturi dhe shëndet. Gjithçka ka bërë për mua, familjen time dhe për të gjithë do doja që t’ia riktheja mbrapsht”, thotë Shevçenko, i cili festoi edhe ai vetë 40 vjetorin dje. “Shumë urime president! Kur ai na fliste për ëndrra, ishte shumë i zoti dhe na bënte me të vërtetë që të ëndërronim për të mbërritur në majë të botës. Ai donte të na bënte për vete. Ne ishim të rinj dhe të dëgjueshëm. Ky ishte sekreti i tij”, kujton Alesandro Kostakurta.
De Laurentis Edhe presidenti i Napolit u zgjua me një “Twitter” special: “Katër herë 20 vjeç! Urimi im është që ti të jetosh 20 vitet e ardhshme si këto 80 vite. Shumë urime Silvio”. Miku Putin Dhe mes shumë politikanëve ndërkombëtarë, në këtë përvjetor nuk mungoi as telefonata e mikut të tij, Presidentit rus, Vladimir Putin. “Presidenti i Federatës Ruse, Vladimir Putin, i telefonoi ish
kryeministrit të Republikës italiane dhe presidentit të Partisë Forca Italia, Silvio Berluskoni, ku i uroi për ditëlindjen e tij të 80të shëndet dhe suksese të mëtejshme”, thuhej në komunikatën e Kremlinit.
