Trajneri i Kombëtares, Silvinjo sqaroi mungesat në listë për dy ndeshjet ndaj Anglisë dhe Andorrës.
Tekniku kuqezi, zbuloi se katër lojtarë, Mitaj, Daku, Hysaj dhe Bare janë lënë jashtë për shkak të dëmtimeve të tyre. Braziliani zbuloi se Mitaj do i nënshtrohet operacionit dhe do të jetë jashtë për kohë të gjatë.
“Katër lojtarë fatkeqësisht për shkak dëmtimi nuk janë gati dhe do na mungojnë. Mitaj është jashtë prej një muaji e gjysmë. U rikthye në fushë dhe u dëmtua sërish, Do i nënshtrohet operacionit. I dyti është Keidi Bare, i cili ka problem në pulpë. Me Hysajn kam folur vetë, mund të jetë gati pas pauzës së kombëtares. Daku gjithashtu vuan nga dëmtimi dhe do të jetë jashtë.”
Sipas Silvinjos, Kombëtaren shqiptare e presin dy ndeshje të ndryshme, por do të përgatiten mirë.
“Kemi dëmtime, por edhe në kampin tjetër ka dëmtime. Kjo është diçka që ndodh. Janë dy ndeshje të ndryshme, të vështira. Anglia është një nga ekipet më të forta në botë, kanë një trajner të nivelit të lartë. Të dyja ndeshjet do i përgatisim mirë, për tu përballur me këto dy kundërshtarë.”
Trajneri sqaroi edhe mungesën e sulmuesit Taulant Seferit në listë.
“Në aspektin strategjik për dy ndeshjet e radhës, kemi më tepër lojtarë në krahun e majtë. Seferi ka një rrugëtim të mirë me Kombëtaren, jep gjithçka në fushë. Kemi nisur një vit të rëndësishëm dhe kemi një ëndërr për të shkuar në Botëror. Mund të vijë një pyetje për Mehmetin, por duhet të dinë se sot nuk janë, por në të ardhmen mund të jenë pjesë e ekipit”, tha ai.
Silvinjo deklaroi se tani i njeh më mirë lojtarët dhe do të punohet për pjesën e përqendrimit.
“Në dy vite i njeh lojtarët dhe mentalitetin. Ne punojmë shumë për të përmirësuar skuadrën. Punojmë për përqendrimin. Na ka ndodhur të humbasim prej mungesës së përqendrimit. Europiani na ka dhënë eksperiencë. Do bëjmë ndryshime të rëndësishme, kryesisht te përqendrimi, por duke mos humbur ekuilibrin”, deklaroi Silvinjo.
Kombëtarja do të luajë ndeshjen e parë ndaj Anglisë në “Wembley” më 21 Mars, në orën 20:45. Takimi i dytë është më 24 Mars ndaj Andorrës në stadiumin “Arena Kombëtare” në Tiranë, në orën 20:45.
