Vijon me ritme të shpejta procesi i rinumërimit të votave për subjektet politike dhe kandidatët në listat e hapura për Qarkun e Fierit. Gazetarja Klesiana Omeri në një lidhje të drejtpërdrejt nga pallati i sportit “Farie Hoti” në Tiranë ku po zhvillohet ky proces, ka zbuluar se nga rinumërimi është përsëritur fenomeni i votave të pamerituara në kuti sikurse ndodhi me Tiranën.
“Deri më tani 76 vota të cilat i janë zbritur nga ky proces koalicionit opozitar, ndërsa Partia Socialiste ka arritur të rikuperojë vota nga procesi i rinumërimit, specifikisht 19 vota. Nuk ka pritshmëri deri më tani për koalicionin “Shqipëria Bëhet”, i cili kërkoi që të bëhej procesi i rinumërimit për të fituar 518 vota që do t’i jepnin një mandat deputeti në qarkun e Fierit që do ia merrnin Partisë Socialiste. Deri tani nuk ka arritur të rikuperojë asnjë votë”, tha Omeri.
Konkretisht rezulton se kandidatja me më shumë vota të pamerituara në kuti është Silva Hasaj nga koalicioni opozitar PD – Aleanca për Shqipërinë Madhështore, me më shumë se 580 të tilla, ndërsa nga Partia Socialiste është Ceno Klosi.
“Sërish në radhët e kandidatëve është vërejtur numër i lartë i votave të pamerituara në kuti. Në listën e hapur të koalicionit opozitar, është Silva Hasaj që ka një numër të konsiderueshëm votash të pamerituara. 580 të tilla që duket se nuk është më një gabim njerëzor, pavarësisht se do të jetë në gjykimin e KAS-it për të bërë vlerësimin dhe për të verifikuar dhe më pas një hetim më të thelluar se çfarë ka ndodhur me këtë numër të lartë votash që ka patur Silva Hasaj dhe që i janë zbritur tashmë. Gjithsesi këto vota nuk sollën një ndryshim në listën e PD-së. Ky fenomen është vërejtur dhe tek kandidatët e PS, ku nga kandidatët me më shumë vota të pamerituara në kuti është kandidati Ceno Klosi. Gjithsesi KAS do të presë deri në përfundim të këtij procesi për të bërë një vlerësim përsa i përket numrit të lartë të votave për këta kandidatë”, raporton gazetarja Omeri, e cila shton se procesi i rinumërimit për Fierin pritet të mbyllet paraditen e së mërkurës, ndërsa kanë mbetur afro gjysma e kutive.
Pasi të mbyllet rinumërimi për Fierin, i njëjti proces do të nisë për Qarkun e Durrësit, i cili pritet të mbyllet më shpejt duke qenë se nuk do të jenë të gjitha qendrat e votimit dhe për të njëjtën arsye nuk ka pritshmëri për të prodhuar ndonjë ndryshim në mandate. Me Durrësin do të mbyllet i gjithë procesi i rinumërimit.
Nga përfundimi i rinumërimit më 27 qershor të 1207 kutive të votimit për Tiranën, nuk rezultoi asnjë ndryshim i rezultatit, as për subjektet dhe as për kandidatët.
Konkretisht, nga rinumërimi, demokratët të cilët kishin kërkuar nisjen e këtij procesi dolën me 612 vota më pak se nga numërimi i parë, ndërsa socialistët me 380 vota më pak. Këto vota, përfaqësuesit e KAS-it i cilësuan si gabime. Deri më tani, kryetari i Partisë Demokratike Sali Berisha nuk e ka njohur rezultatin e zgjedhjeve të 11 majit, duke e cilësuar si të manipuluar./tvklan.al
