Java e parafundit në Serinë A të kampionatit italian në basketboll për meshkuj dha verdiktet e sezonit 2016-2017. Dhe mrekullia erdhi nga skuadra e Pezaros. Trajneri shqiptar Spiro Leka siguroi mbijetesën e ekipit. Për ata që sfida përcaktuese me kryesuesit e milanezëve të Emporio Armanit do të ishte një ëndërr, në fakt fundi i asaj mbrëmje dramatike u bë realitet.
Triumfi i merituar në shifrat e përgjithshme 90-79 siguroi mbijetesën në elitën e “koshit” italian edhe për sezonin e ardhshëm për “armatën” e drejtuar nga “arkitekti” Leka. Skuadrës vendëse i mjaftoi një periodë e katërt shkatërruese të fituar 33-22, nga të cilat 14 mbajtën firmën e një super-Hazell dhe 12 të Xhons.
Pikërisht ky i fundit ishte edhe pikëshënuesi më i mirë i ndeshjes me 27 pikë të realizuara, shtuar edhe 12 topa në tabelë. Nga radhët e të zotëve të shtëpisë, një performancë të kënaqshme bënë gjithashtu edhe Rotnei Klark, autor i 23 pikëve. Ndërsa për miqtë nga Milano nuk ishin të mjaftueshme 13 pikët për “kokë” të Hikmen dhe Simon.
Vendësit e Consultinvest e nisin me presing dhe, pas tre minutave të parë, udhëheqin 9-2. Pas pesë minutave, Senders për kryesuesit ulet në stol pas tri personaleve. Në minutat në vazhdim, finalizimi është i ulët dhe Emporio Armani kalon për herë të parë në avantazh 11-10 (në minutën e 8-të), megjithatë bardhekuqtë nuk dorëzohen duke i përmbysur shifrat dhe e mbyllur periodën e parë në avantazh 16-13.
Paskolo për milanezët firmos një tjetër avantazh 21-18, (minuta e 13-të). Milanezët ndezin “motorët” me lojtarët e stolit dhe udhëheqin në +5 pikë, por ndeshja ka shumë rivalitet mes dy kampeve. Minuta e 19-të regjistron avantazhin më të madh të deritanishëm 32-26. Por në fundin e periodës, Hazell ngushton në -2 pikë (32-34).
Ka qenë Hazell për vendësit heroi i këtij takimi, i cili me një “bombë” për tri pikë çon në delir 7000 tifozët e pranishëm, 79-72. Hazell nuk ndalet në specialitetin e tij dhe sërish perfekt për tri pikë. Pezaro kryeson 82-74. Tri gjuajtjet e lira të Xhons vulosin matematikisht qëndrimin e Pezaros në Serinë A. Pa dyshim ky ka qenë shpëtimi më i vuajtur i të gjitha kohërave për skuadrën e Pezaros për të cilën meritën e veçantë e kishte pa asnjë diskutim shqiptari Spiro Leka.
Deklarata
Trajneri Spiro Leka u shpreh entuziast për suksesin e arritur. “Jam i lumtur sepse njerëzit janë në delir. Kur më morën mua dhe Kalbinin (asistenti) mendova se ishin të çmendur. Provuam të ndryshonim mendimet që kishin të tjerët. Sot në mbrëmje i thamë njëri-tjetrit: të mendojmë vetëm për vete, sepse për ne është ndeshja e jetës. Për ata ishte thjesht një stërvitje në prag të diçkaje të rëndësishme. Kjo ishte fitorja e skuadrës. E kemi thënë që në fillim ‘nuk do të dorëzohemi kurrë’. Ia dolëm të ringrihemi”.
Mirënjohja
Presidenti i skuadrës Ario Kosta ka shprehur mirënjohjen për trajnerin Leka për objektivin e realizuar. “Ta mbyllësh në këtë mënyrë është gjithmonë bukur. Shpresonim se mund ta siguronim mbijetesën pak më herët, por edhe kështu shkoi shumë mirë. Dua të falënderoj Spiro që bëri atë të cilën kishim nevojë. Kemi marrë objektivin minimal, por jam jashtëzakonisht i lumtur. Tashmë kam më tepër thinja dhe kam rënë në peshë. Faleminderit të gjithëve me të cilët kam ndarë këto katër vite punë dhe vuajtje. Faleminderit Pezaros dhe 7000 tifozëve sot”.
Kush është trajneri Leka
Spiro Leka është Mjeshtër i Merituar në basketboll. Ai është aktivizuar me Partizanin nga 1983-1991 dhe është shpallur 7 herë me titullin kampion. Në Kupën e Kampioneve (sot Euroliga) në 1983 dhe 1988 po me Partizanin futet mes 16 skuadrave më të forta të Europës duke u ndeshur me Banko di Roma dhe me Skavolinin e Pezaros në një nga periudhat më të suksesshme të basketbollit shqiptar.
Nga 1991 fillon punën në Itali si trajner. Në 2010-n firmos kontratën e parë si profesionist te Skavolini Pezaro, një nga klubet më të rëndësishme në Itali. Tre vitet e para ka qenë përgjegjës teknik i ekipeve të moshave dhe trajner i U-19-ës. Në 2013-2014 emërohet zëvendëstrajner i ekipit të parë, ndërsa në muajin mars të 2017-ës mori drejtimin e Pezaros./Panorama Sport
