Ben Azubel është i vetmi izraelit që luan në futbollin shqiptar, ndaj, për të, ndeshja e së shtunës mes kombëtares së tij dhe asaj kuqezi merr një domethënie të veçantë. Sulmuesi i Partizanit thotë se dueli në “Elbasan “Arena” do të jetë i bukur, ndërsa pranon se ai do të jetë një nga të paktët tifozë miq në mes të detit kuqezi.
Në një prononcim për “SuperSport”-in, 23-vjeçari u ndal veçanërisht te çështja e sigurisë, kryefjala e ditëve të fundit. Azubel thotë se në Shqipëri ndjehet i sigurt si në shtëpi. ”Ndjehem mirë në Shqipëri. Dal në rrugë me të fejuarën. Më pëlqen Tirana dhe mendoj se niveli i sigurisë është shumë i lartë. Nuk jam ndier asnjëherë i pasigurt. Këtu ndjehem si në shtëpinë time”, shprehet shtatlarti izraelit.
Sa i takon ndeshjes, ai u shpreh i sigurt se Izraeli i ka të gjitha mundësitë për t’ia dalë në Elbasan: “Kam ndjekur dy ndeshje të Shqipërisë dhe mendoj se Izraeli do të fitojë, si dhe ka shanse të shkojë në Kupën e Botës”.
Në fund, sulmuesi analizon edhe situatën e tij në radhët e Partizanit, ku ende nuk ka gjetur hapësirat e dëshiruara. “Aventura ime filloi mirë në Shqipëri, por kur nisi kampionati u dëmtova. Këtë moment e kalova me sukses dhe tani ndihem mirë”, thotë Ben Azubel.
