Ministri i Mbrojtjes, Pirro Vengu ka zhvilluar një vizitë në bordin e një prej anijeve të flotës luftarake italiane të ankoruara në brigjet shqiptare.
Përmes një postimi në rrjete sociale, Vengu njofton se u prit nga komandanti i Forcave Detare italiane, admirali Enrico Credendino.
Vengu tha se një nga temat e takimit ishte siguria e përbashkët në Adriatik, me fokus në misionet e përbashkëta në kuadër të bashkëpunimit dypalësh dhe nismës ADRION
“Gjatë vizitës në bordin e një prej anijeve të flotës luftarake italiane me Komandantin e Forcave Detare italiane, Admiralin Enrico Credendino, diskutuam tema të rëndësishme për sigurinë e përbashkët në Adriatik, me fokus në misionet tona të përbashkëta në kuadër të bashkëpunimit dypalësh dhe Nismës ADRION.
Një tjetër pikë e rëndësishme e bisedës ishte mbështetja dhe zhvillimi i kapitalit njerëzor. Investimi në trajnimin dhe profesionalizimin e ushtarakëve tanë është prioritet i Ministrisë së Mbrojtjes, dhe jam i lumtur që homologët tanë italianë do të vazhdojnë të na mbështesin në këtë drejtim.
Ky bashkëpunim i fortë në të dy anët e Adriatikut, përmes misioneve, stërvitjeve dhe trajnimeve të përbashkëta, forcon edhe më tej marrëdhëniet tona në fushën e sigurisë detare”, shkruan Vengu.
