Autoriteti i Mbikëqyrjes Financiare duhet të jetë pjesë e Komitetit të Rindërtimit. Pas përpilimit të listës së banesave të shkatërruara ose të dëmtuara nga tërmeti, AMF duhet të bëjë publike listën e fondit të banesave që janë te siguruara.
Këto dy lista duhen kryqëzuar dhe qytetarët që kanë banesën e siguruar nuk duhet të përfitojnë apartament nga shteti.
Ka shumë shtëpi të cilat janë blerë me kredi dhe që janë detyrimisht të siguruara. Këto banesa duhet të dëmshpërblehen deri në qindarkën e fundit nga shoqëritë e sigurimeve dhe të mos paguhen nga fondi shtetëror i rindërtimit.
Familja, e cila ka banesën e siguruar merr paratë nga shoqëria e sigurimit dhe përjashtohet nga lista e kompensimit shtetëror. Kjo do të ulë barrën për taksapaguesit. Aq sa janë, një, dy, 10 shtëpi të dëmshpërblehen plotësisht.
I gjithë procesi i shlyerjes së dëmit nga shoqëritë e sigurimit duhet të ndiqet nga AMF, e cila duhet të ketë detyrimin ligjor të informojë Komitetin e Rindërtimit. Shoqëritë e sigurimit që refuzojnë të paguajnë duhet të çohen në përmbarim.
Në të kundërt do të ndodhe që qytetarët do të subvencionojnë fitimet e paligjshme të shoqërive të sigurimit.
