Prokurori i Apelit në Tiranë, Gentian Trenova nuk e kaloi procesin e vetingut dhe pas mbi 20 viteve punë shkarkohet nga detyra. Vendimi u dha sot në Komisionin e Pavarur të Kualifikimit. Ai njihet si prokurori i bandës së Lushnjës dhe i Aldo Bares. Sipas KPK-së z. Trenova ka mospërputhje në atë që deklaron për pasurinë e tij. Por avokati i tij thotë se do ta apelojë vendimin dhe ngre pikëpyetje mbi metodologjinë e KPK-së për të djegur sipas tij magjistratët më të mirë në vend.
“Është një vendim totalisht i padrejtë dhe thellësisht i gabuar. Pas dy dekadash kontribut në sistemin e drejtësisë, prokurori ka deklaruar pasuri të vetme një apartament 50 metra katrorë, një ndërtim i kokës së diktuaturës në vitet ’70. Kjo është pasuria e tij e vetme për të dhe familjen e tij. Megjithatë ky standard pasurie u gjet i papërshtatshëm për të kaluar me sukses kriterin e vlerësimit të pasurisë. Nëqoftëse as ky standard nuk vlen për komisionin për të kaluar vettingun, diçka është shumë gabim me metodologjinë që po përdor ky komision me të gjithë magjistratët”,- u shpreh avokati.
Më tej shtoi se “është për të ardhur keq sepse Shqipëria nuk e ka luksin të humbasë njerëzit e përgatitur në këtë mënyrë”.
Gjatë seancës mësohet se ka patur debate mes përfaqësuesit të ONM-së, Theo Jacobs (belg) i cili replikoi ashpër me z. Trenova për blerjen e apartamentit 50 metra katrorë që më pas ia dhuroi vjehrrit, dupleksin e ndërtuar prej tyre, dhe për dy kontrata. Në kontratën e parë për blerjen e shtëpisë Trenova thoshte se do ta blinte 40 mijë euro. Në të dytën prokurori firmos se e ka blere 1 milionë e 900 mije lekë me ndihmën e 28 mije eurove kredie të shpenzuara edhe për mobilimin.
Theo Jacobs pyeti prokurorin Trenova: Kujt i duhej besuar dhe pse ia kishte dhuruar shtëpinë vjehrrit? Prokurori u përgjigj se kjo është një marrëdhënie familjare. Ndërsa për kontratat Trenova tregoi se e vlefshme është kontrata e dytë, përderisa kontrata e parë ishte një kontratë porosie.
Deklarata e avokatit:
