Një biznesmen libanez por me shtetësi amerikane u rrah keqas në rrugën e Rinasit ditën e shtunë, nga persona ende të paidentifikuar. Në komunikatën e parë për mediat policia tha se bëhet fjalë për një zënke banale që ka lindur nga përplasja e dy mjeteve.
Por hetimet dhe dëshmitë e deritanishme tregojnë krejt të kundërtën. Biznesmeni dyshohet se është rrahur si formë presioni për tu larguar nga Shqipëria, ku edhe ka nisur ndërtimin e një resorti turistik tek Gjiri i Lalzit.
Ndërkaq, nga hetimet dalin në dritë të dhëna të tjera. 55-vjeçari Fadi Mitri, ka qenë i shoqëruar me bashkëshorten e fëmijët në momentin kur ka ndodhur ngjarja.
Burime të rezervuara nga grupi hetimor thanë se ai është goditur 10 herë në kokë dhe 7 herë të tjera në gjymtyrë e për pasojë ka hemtoma të shumta, ndërsa njërën këmbë e ka të thyer, shkruan Panorama.
Tre djem të rinj kanë sulmuar biznesmenin, pasi i kanë përplasur makinën me të cilën ai udhëtonte në rrugën e Rinasit, paraditen e së shtunës. Ndërsa sipas dëshmisë që ai dhe shoferi i dhunuar kanë dhënë para hetuesve, njëri nga autorët ka filmuar të gjithë skenën.
Sipas burimeve, ky veprim i kryer nga ana e autorëve tregon se ata mund të kenë qenë të porositur për sulmin nga persona të tjerë dhe filmimi u është nevojitur si provë për të treguar se porosia është kryer.
Vetë biznesmeni i plagosur ka arritur të fiksojë targën e automjetit “Tuareg”, ku ndodheshin autorët, të cilën edhe e ka fotografuar, pasi mjeti gjatë gjithë rrugës kryente manovra të rrezikshme dhe parakalonte makinën e tij.
Burimet thanë se makina ka qenë me targa italiane, të vjetra, që pas verifikimeve nuk kanë rezultuar të ketë kaluar në rrugë zyrtare kufirin shqiptare.
Targat mund të jenë të vjedhura dhe janë përdorur enkas për të kryer sulmin ndaj sipërmarrësit 55 vjeçar Fadi Mitri.
Të gjitha këto të dhëna dëshmojnë për një sulm të paramenduar dhe të qëllimshëm nga ana e autorëve dhe aspak për një ngjarje aksidentale, ashtu siç u tha dy ditë më parë në njoftimin paraprak të policisë.
Mitri është administrator i kompanisë nga Katari, “Omnix Albania”, e cila do të ndërtojë një resort gjigant me vlerë 180 milionë euro në Gjirin e Lalzit.
Sulmi dyshohet paraprakisht se ka lidhje pikërisht me këtë investim që do të kryhet.
Persona të ndryshëm, që kanë kaluar me makina pranë vendit të ngjarjes, kanë deklaruar se mes personave që ndodheshin në dy mjetet e përplasura, kishte ndodhur edhe një përleshje fizike.
Ndërsa të tjerë flisnin për persona të gjakosur në anë të rrugës, që kishin nevojë për ndihmë mjekësore. Megjithatë, askush nuk ka dhënë dëshmi të qarta rreth autorëve që shkaktuan ngjarjen, por vetëm për mjetin me të cilin ata janë larguar. /Opinion.al
