Protesta e sotme e banorëve të Unazës së Re përballë parlamentit degjeneroi në dhunë ndërsa në foltoren e parlamentit fliste kryeministri i vendit Edi Rama. Ky i fundit i quajti banorët e Unazës së Re zaptues dhe u bëri thirrje të lirojnë rrugën.
Rama përmendi disa emra banorësh që sipas tij kanë ndërtuar disa godina në Tiranë. Ndërsa Rama fliste me sarkazëm e ironi ndaj tyre, protestuesit tentuan të çajnë gordonin e policisë dhe të hynin në parlament.
Forca të shumta policie ishin dislokuar përpara parlamentit, por për fat të keq në vijë të parë ishin policet femra. Kësisoj gjatë përleshjes polici-protestues u hodhën edhe kapsolla dhe mjete të tjera shpërthyese.
Një efektive e forcave Shqiponja, e re në moshë mbeti e plagosur. Pamjet e polices që ulëret e llahtarisur nga dhimbjet e plagëve kanë bërë xhiron e rrjeteve sociale.
Policja e plagosur është Ina Muka, 24 vjeçe. Sipas zëdhënësit të policisë e reja ka humbur 4 gishtat e njërës dorë për shkak të një kapsolle që dyshohet se është hedhur nga protestuesit.
Policia tha se në Spitalin e Traumës në Tiranë po marrin mjekim 12 punonjës policie. Mes tyre 2, në gjendje më të rëndë. Edhe nga ana e banorëve ka persona të plagosur. Janë dy gra dhe një burrë që po marrin trajtim në spitalin e Tramës. Sakaq pas protestës janë shoqëruar në komisariat një numër i madh protestuesish.
