Detaje të reja janë zbardhur nga mediat greke lidhur me arrestimin e të shumëkërkuarit të policisë, Laert Haxhiu në Janinë.
Mediat greke shkruajnë se oficerët e sigurimit të Janinës arrestuan një bandit të rrezikshëm shqiptar pas një ndjekjeje aventureske mbrëmjen e së hënës.
Gjithçka ka nisur kur efektivët e policisë i kanë bërë shenjë drejtuesit të një mjeti luksoz tip “BMW” të ndalojë në zonën e Eleuzës së Janinës. Ai, megjithatë, nuk iu bind por shtypi gazin në tentativë për t’iu larguar policisë.
Gjatë ndjekjes, mjeti, i cili nuk ka mundur të ndalojë me sinjalin e policisë, ka përplasur tre automjete, ka ngecur në semafor dhe më në fund është ndalur kur ka përplasur një bordurë dhe i shpërtheu goma.
Më pas policia ka gjetur rastin dhe ka arrestuar drejtuesin dhe dy pasagjerët e tjerë të mjetit.
Sipas ERT, nga hetimet rezultoi se një nga tre të arrestuarit ishte shqiptarI LAERT HAXHIU, i cili kërkohet nga policia shqiptare si pjesëtar i një grupi kriminal dhe akuzohet për vrasje dhe tentativë vrasje në Shqipëri. Madje, ndaj tij ishte shpallur “njoftimi i kuq” i kërkuar nga Interpoli.
Ai qëndronte në Greqi me dokumente të falsifikuara. Në lejen e qëndrimit greke, ai mbante identitetin si Mikis Askalidis, 32 vjeç, lindur në Gjeorgji./Opinion.al
