Nga Pogradeci, Presidenti Ilir Meta dukej se kishte humbur “qetësinë dhe dashurinë”. Mesazhet e tij për krizën politike ishin të forta, ndërsa tha se ishte gati të sakrifikojë jo vetëm mandatin e Presidentit, por edhe jetën si Salvador Allende që të mos instalohet një juntë ushtarake.
Por le të thjeshtojmë mesazhet që dha sot kreut i shtetit shqiptar.
*Kriza sipas presidentit është e qëllimshme dhe më shumë faj për këtë ka qeveria. Sipas Metës vendi nuk ka Gjykatë Kushtetuese dhe pothuajse i gjithë sistemi gjyqësor është i paralizuar
*Vendimi i opozitës për të djegur mandatet është i papranueshëm dhe i dënueshëm
*Kuvendi sipas Metës aktualisht ka 82 deputetë duke përfshirë 3 deputetët e opozitës që nuk pranuan të dorëzojnë mandatin. Kështu kreu i shtetit thotë se zëvendësimi i deputetëve është i kontenstueshëm. Madje Presidenti bën ironi teksa thotë se nuk mund të futet në Kuvend çdo individ që ka mbushur 18 vjeç. (Një ditë më parë një kandidate 24-vjeçare nga LSI, pranoi të marrë mandatin e deputetes)
*Presidenti flet për metoda policore, financiare për zgjidhjen e krizës. Sipas tij kjo krizë zgjidhet medialog, në të kundërt paralajmëron pasoja të paparashikueshme.
*Meta thotë se ka ofruar një tryezë dialogu por është refuzuar. Sipas tij kriza mund të zgjidhet brenda Shqipërisë pa përfshirë ndërkombëtarët. “Ne jemi të aftë të zgjedhim pozitë dhe opozitë një kryenegociator të përbashkët dhe Shqipëria ka shumë të tillë, me integritet, me profesionalizëm, me reputacion ndërkombëtar”, thekson presidenti.
Më poshtë janë disa nga deklarata e Presidentit Meta pas vendimit të opozitës
20 shkurt 2019, Ilir Meta për DW: Vlerësoj se çdo veprim ekstrem nuk i shërben demokracisë, nuk i shërben forcimit të institucioneve dhe nuk i shërben njëkohësisht as integrimit europian të vendit, që është dëshira e çdo qytetari shqiptar. Është koha të kemi një hap prapa nga opozita, por mendoj që është koha të kemi edhe dy hapa pas nga mazhoranca, nga qeveria dhe nga Kryeministri, të cilët duhet të kuptojnë që përgjegjësitë kryesore për qeverisjen e vendit janë të tyre.
2 mars 2019, Ilir Meta nga Lezha: Duhet të punojmë për bashkim dhe bashkëpunim, jo vetëm çdo 2 Mars e 28 Nëntor, por çdo ditë, në mënyrë që ta fitojmë mundësinë për çeljen e negociatave në qershor, bashkë edhe me Maqedoninë e Veriut. I vetmi apel është për bashkëpunim, për bashkim, për reflektim për të parë më larg.
4 mars 2019, Ilir Meta në konferencë me homologun slloven: Jemi në kushtet e një krize politike dhe institucionale, e cila mund dhe duhet të ishte shmangur. Në mënyrë sistematike kam apeluar për dialog për të evituar këtë situatë. Palët të bëjnë hapa pas për të vendosur rendin demokratik dhe institucional. Kur vihen në radhë të parë interesat kombëtare duhet të na shtyjnë drejt zgjidhjeve të mençura të kësaj situate.
18 mars 2019, Ilir Meta: Është për të ardhur keq që palët kanë nxituar dhe nxitojnë për ta thelluar këtë krizë, por përsëri është detyra ime të bëj thirrje për reflektim nga të gjithë, sepse duhet të shikojmë interesin e vendit dhe të qytetarëve tanë, të cilët kërkojnë normalitet, por njëkohësisht dhe të vazhdojmë të shtojmë kontributin e Shqipërisë si faktor stabiliteti, në këtë rajon ende me sfida të rëndësishme. Kjo situatë e brendshme nuk na ndihmon në këtë drejtim. Mendoj se klasa politike shqiptare duhet të marrë përgjegjësitë e saj dhe nuk duhet të fshihet pas asnjë ndërkombëtari, siç ka ndodhur deri tani, dhe çështjet duhet të zgjidhen me dialog në mënyrë transparente, në mënyrë parimore, larg pazareve dhe keqpërdorimeve, qoftë edhe të ndonjë ndërkombëtari./Opinion.al
