Njerëzit në mbarë botën po kthehen gradualisht në vendet e tyre të punës, por, pas disa muajsh bllokimi dhe punimi nga shtëpia, shumë prej tyre akoma funksionojnë sikur të jenë në izolim, duke mbajtur një distancë fizike nga kolegët e tyre.
Komunikimi i kryer pa lidhje të drejtpërdrejtë vizuale, verbale ose prekëse e bën ndërveprimin më pak personal, që ndonjëherë mund të haset si i befasishëm apo edhe i vrazhdë. Si rezultat, keqkuptimi ose konflikti mund të lindë midis kolegëve.
Ekspertët thonë se megjithëse njerëzit mund të jenë rikthyer fizikisht në vendin e tyre të punës, disa ende mund të mendojnë dhe të veprojnë ashtu si vepruan kur punonin nga shtëpia.
‘Pandemia ka bërë që disa njerëz të kalojnë në modalitetin e mbijetesës. Ata mund të shqetësohen për ekonominë dhe të mbajnë veten dhe familjen të sigurt. Kjo mund të bëjë që njerëzit të mendojnë për skenarët e rasteve më të këqija, të cilat krijojnë tension brenda vetes, familjes dhe punës’, – thotë psikologia klinike e Hong Kongut, doktoreshë Monica Borschel. ‘Kur njerëzit janë në gjendje të mbijetesës, ata veprojnë ndryshe. Kur njerëzit besojnë se burimet janë të pakta, ata mund të kthehen kundër njëri-tjetrit. Zakonisht, kjo nuk është e vetëdijshme’. Njerëzit kanë mënyra dhe sjellje të ndryshme për të mbijetuar, dhe sistemi nervor i të gjithëve vepron ndryshe. Disa mund të ndjehen sikur kolegu i tyre nuk po bën punën e tij, ose është një kërcënim. Të tjerët mund të ndjehen të pa vlerësuar dhe të nënvlerësuar. Këto dinamikë mund të çojnë në keqkuptime dhe konflikte.
Borschel thotë se kur njerëzit nuk ndihen mirë emocionalisht, ata nuk kanë aftësinë emocionale për të dëgjuar ndjenjat ose nevojat e ndokujt tjetër. Duke pasur parasysh këtë, është thelbësore të njihni lodhjen tuaj emocionale dhe ta adresoni atë, para se të siguroni në mënyrë efektive mbështetje emocionale për kolegët tuaj.
Shumë njerëz ndihen nën presion gjatë kësaj kohe të vështirë, kështu që kur dikush nuk sillet si normalisht, Borschel na këshillon të marrim kohën për të kuptuar se ata mund të kenë një nevojë që nuk po përmbushet. Këto nevoja përfshijnë intimitetin, hapësirën, dashurinë, sigurinë dhe vlerësimin. Borschel thotë se është e rëndësishme të kuptohet dallimi midis kritikës konstruktive dhe kritikës shkatërruese. ‘Kritika konstruktive vjen nga një vend shqetësimi dhe përmirësimi; kritika shkatërruese ka të bëjë më shumë me personin tjetër,’- thotë ajo. ‘Çështja kryesore është të mendoni se të gjithë po bëjnë më të mirën që munden, me atë që kanë.’
Ne mund të tregojmë empati dhe dhembshuri duke kontrolluar herë pas here me kolegët, edhe nëse kjo realizohet vetëm duke dërguar një mesazh ose duke pranuar se shumica e kolegëve tanë po përjetojnë një lloj stresi. Mos e merrni personalisht nëse nuk i përgjigjen mesazhit tuaj. / Opinion.al
