Polica e Shtetit duket se ka humbur betejën më grupet kriminale në Shkodër. Vrasja e biznesmenit 35-vjeçar Ferdinand Polia është e fundit, nga lista e gjatë e ngjarjeve tragjike që kanë ndodhur në këtë qytet.
Vetëm pak ditë më parë u grodit një grup kriminal që jepte para me fajde, ku të përfshirë ishin dhe zyrtarë ndërsa ekzekutimet mafioze vazhdojnë të tronditin qytetin. Përplasjet nisën që më fillimin e vitit 2018. Më 13 janar, ndaj Lulzim Kullës u bë atentat me eksploziv.
42-vjeçari me precedentë penalë ka lidhje familjare me një nga familjet e njohura që kontrollojnë gjobëvënien e biznesit. Shënjestra shpëtoi, por arrestohet më vonë ndërsa po ikte në Greqi.
Pak muaj më vonë, vritet me armë zjarri Mehdi Kavaja, pronari i një servisi të automjeteve. Ai u qëllua me plumb në kokë në banesën e tij, por asnjë autor dhe motiv nuk u zbulua.
Në 15 korrik u ekzekutuan me armë zjarri në makinë çifti Boran Bërcana dhe Silvi Ndoci. Ish-polici ishte dyshuar për lidhje kriminale me një prej familjeve, emrin e të cilës opozita e përmend si të lidhur ngushtësisht me eksponentë të së majtës.
Në 10 gusht vritet në atentat 53-vjeçari Fatbardh Lici, ndërsa ndodhej në lagjen e tij. Ai ka qenë i dyshuar se në vitin 2011 ka qenë i përfshirë në vrasjen e Astrit Kurmemajt, i dënuar me 25 vite burg për disa vrasje ndaj një tjetër familjeje në Shkodër. Fatbardh Lici ka lidhje familjare me Lulzim Kullën.
Që prej datës 23 gusht janë zhdukur dy persona në Shkodër, daja dhe nipi i tij, Agron Mollaj dhe Gëzim Hysa. Pastaj ndodhi vrasja e 30-vjeçarit Arjan Verracaku, që mendohet se ka lidhje me serinë e ngjarjeve nga përplasja e dy familjeve me emër në Shkodër./Opinion.al
