Një ngjarje si në filmat aksion. Tre persona kanë tentuar të rrëmbejnë një efektiv policie. E gjithë ngjarja ka ndodhur në një hotel në zonën e Saukut, ndërsa 25-vjeçari Ndue Ndoj ishte duke pirë kafen në këtë zonë pasi vazhdon studimet pranë Akademisë së Sigurisë.
Fillimisht ai është thirrur nga agresorët të cilët kanë qenë brenda një automjeti të parkuar përpara hotelit ku ndodhi ngjarja. Efektivi dhe tre personat që e kanë sulmuar njiheshin më herët me njëri-tjetin.
Njëri prej agresorëve ka qenë i armatosur dhe i ka vënë armën në kokë 25-vjeçarit, por në momentin kur ata kanë tentuar ta marrin me forcë, Ndoj ka bërë rezistencë duke i marrë edhe armën nga dora.
Pas konfrontimit, ai ka plagosur Ervis Muratin 27-vjeç, një prej personave i cili po përpiqej ta rrëmbente.
Ndue Ndoji fillimisht është larguar nga vendngjarja, ndërsa më pas është vetëdorëzuar në polici. Ndërkohë kërkimet vazhdojnë për dy personat e tjerë të përfshirë në ngjarje. /Opinion.al
