Gjykata e Krujës ka dhënë masën e sigurisë “arrest me burg” për Kujtim Picarin, shoqëruesi i vlerave monetare i një banke të nivelit të dytë dhe Vangjel Nikollën, drejtor i shërbimeve aeropotuale në Rinas.
Picari akuzohet për shpërdorim detyre për shkak të grabitjes së rreth 1 milion eurove pak ditë më parë në pistën e aeroportit të Rinasit.
Ndërkohë, gjyqtarja Enkeleida Hoxha është tërhequr nga gjykimi për shkak të një konflikti interesi me Fadil Jonuzaj, Arben Karafili dhe Bledar Blloshmi. Tre të ndaluarit mbrohen nga Fatmir Braka me të cilin gjyqtarja Hoxha ka një proces civil.
Gjykata ka vendosur që për të ndaluarit Fadil Jonuzaj, Arben Karafili dhe Bledar Blloshmi nuk do të jetë gjyqtarja Hoxha ajo që do t’i gjykojë.
Brenda 48-orëve gjykata duhet të marrë masën e sigurisë ndaj 4 të ndalusrve të tjerë.
Arben Karafili, shef i stacionit të Kompanisë ICTS, përgjegjës për sigurinë në pistë, sipas akuzës, nuk ka marrë masat për parandalimin e ngjarjeve të tilla edhe pse ka qenë i informuar për riskun që paraqitej në portën ku hynë grabitësit.
Bledar Blloshmi dhe Fadil Jonuzaj, agjentë të sigurisë, punonjës të ICTS, kanë pasur detyrë të patrullojnë perimetrin ku ndodhi grabitja. Nga disa video të publikuara në media, dallohej makina e grabitësve, teksa hynte në brendësi të aeroportit. Aty dallohet edhe një mjet i Aeroportit, që është afruar tek porta e hapur prej grabitësve. Këtyre punonjësve duket se nuk u ka bërë përshtypje fakti se porta ishte e shqyer dhe se një mjet i paautorizuar ka hyrë në pistë, dhe kanë vijuar normalisht pa u shqetësuar për atë që po ndodhte.
Kjo edhe për faktin se nuk kishte asnjë reagim nga ata për t’u vënë në ndjekje të grabitësve apo të sinjalizonin sallën e kontrollit. Vangjel Nikolla, drejtor i Shërbimeve Aeroportuale në Rinas, nuk ka bërë kontrollin e elementëve të sigurisë që ka marrë përsipër sipas kontratës, të nënshkruar me firmën nënkontraktore “ICST Albania”. Edhe për këtë person rëndon akuza e shpërdorimit të detyrës, pasi kishte rol funksional në garantimin e sigurisë.
Kujtim Picari, shoqërues i vlerave monetare në kompaninë “Nazeri 2000” ka marrë furgonin e blinduar ku ishin paratë pa shoferin. Ai akuzohet se, në vendqëndrimin e automjeteve të shërbimit, në kundërshtim me rregulloren, ka mbajtur të hapura dyert e mjetit, duke u dhënë mundësi autorëve të ngjarjes të futen në kasafortën e mjetit dhe të vjedhin sasinë e parave.
