Policia ka sqaruar dinamikën e atentatit të ndodhur mbrëmjen e djeshme në një lokal në “Don Bosko”, ku mbeti e vrarë shtetasja Mimoza Paja, 58 vjeçe, e cila ishte e punësuar si banakiere si dhe u plagosën 5 persona të tjerë.
Bëhet me dije se Grupi i posaçëm hetimor ditën e sotme ka rikqyrur vendin e ngjarjes, ku janë gjetur dhe sekuestruar edhe disa prova të tjera të vlefshme për hetimin.
Ndërsa sa i takon makinës së djegur të autorëve të gjetur në territorin e fshatit Likmetaj, nga verifikimi i numrit të shasisë së automjetit rezulton se ky mjet tip BMW, seria 5, (525) me ngjyrë gri, ishte vjedhur gjatë natës më datë 14 mars 2021, në lagjen nr 13 Durrës.
Të gjitha provat materiale të sekuestruara në vendngjarje në rrugën “Anastas Shundi” dhe në fshatin Likmetaj, janë dërguar në Institutin e Policisë Shkencore ku po u nënshtrohen ekzaminimeve të mëtejshme.
Ndërkaq dinamika e kësaj ngjarjeje është si më poshtë:
Autorët janë afruar me automjetin tip BMW, me targa të huaja në rrugën “Anastas Shundi”, kanë ndaluar makinën përbri lokalit të shtetasit F. M., dhe dy nga autorët kanë zbritur nga makina duke hapur zjarr me breshëri në drejtim të lokalit. Pas kësaj autorët kanë hipur në automjet dhe janë larguar me shpejtësi në drejtim të spitalit ushtarak, kanë vazhduar në autostradën Tiranë – Durrës, kanë devijuar rrugën në mbikalimin e Vorës dhe kanë djegur automjetitn në fshatin Likmetaj.
Autoritetet janë duke analizuar informacionet për autorë të dyshuar dhe për motivet e kësaj ngjarjeje.
Ndërkaq është ushtruar kontrolle dhe në banesën e pronarit të lokalit, Fatjon Muratit, i cili ishte me masën e sigurimit “Arrest në shtëpi”.
Më datë 07 mars 2023, shërbimet e Policisë së Komisariatit Nr. 3, në zbatim të procedurave standarde të punës, kanë kontrolluar dhe gjetur në banesë shtetasin F. M., ndërsa në kontrollin e ditës së djeshme, ky shtetas nuk është gjetur në banesë dhe është shpallur në kërkim dhe punohet për gjetjen dhe arrestimin e tij./Opinion.al
