Udhëheqësit botërorë po diskutojnë masat kundër pandemisë dhe rishikimin e mundshëm të përgjigjes ndaj krizës që ka shkaktuar ajo.
Takimi i 194 shteteve anëtare të Organizatës Botërore të Shëndetësisë (OBSH), po mbahet online.
Sekretari i Përgjithshëm i Kombeve të Bashkuara, Antonio Guterres tha në hapje të takimit se duhet të ketë më shumë unitet global në luftimin e Covid-19. Ai shtoi se pandemia mund të jetë “edhe më shkatërruese në vendet në zhvillim”.
Sakaq, Presidenti kinez, Xi Jinping, mbrojti veprimet e Pekinit gjatë shpërthimit të pandemisë.
“Të gjithë së bashku kemi vepruar me transparencë dhe përgjegjësi”, tha ai.
Bashkimi Evropian, si dhe vendet e tjera si Britania e Madhe, Australia dhe Zelanda e Re, po bëjnë përpjekje për një hetim për mënyrën se si është trajtuar pandemia.
“Si u përhap kjo pandemi? Cila është epidemiologjia që qëndron pas saj? E gjithë kjo është absolutisht thelbësore për ne që të lëvizim përpara për të shmangur një pandemi tjetër të këtij lloji”, tha Virginie Battu-Henriksson, një zëdhënëse e BE-së.
Asambleja dy-ditore, një takim vjetor që rishikon punën e agjencisë së Kombeve të Bashkuara, vjen në mes të akuzave midis SHBA dhe Kinës për përhapjen e koronavirusit.
SHBA-ja tashmë ka hequr fondet e saj për agjencinë dhe po promovon programin e saj të vaksinës kundër COVID-19.
Presidenti amerikan, Donald Trump e ka akuzuar Kinën për fshehje të informacioneve lidhur me shpërthimin e epidemisë si dhe ka ngritur dyshime se virusi mund të ketë dalur nga një laborator kinez./Opinion.al
