Një fotografi e postuar në rrjetet sociale i kushtoi rëndë një mësuesje në Rusi. Prindërit e nxënësve kërkuan përjashtimin e Tatiana Kuvshinnikova pasi postoi një fotografi ku shfaqej e veshur me fustan të shkurtër dhe taka në dëborë.
Pas kërkesës së tyre një debat i ashpër shpërtheu në shkollën Barnaul, në Altai Krai, sidomos pasi atletja Tatiana, e cila praktikon edhe notin në ujë të akullt, postoi edhe foto me rroba banje. Prindërit të mbështetur nga drejtoresha e shkollës lëshuan një lumë akesash dhe akuzuan 38-vjeçaren për veshje provokuese, duke e quajtur veshjen e saj të ngjashme me të një prostitute.
Drejtoresha e shkollës Olga Gain, e cila ishte përpjekur ta pushonte nga puna edhe më herët, e denigroi mësuesen me anë të një letre.
“Kjo është mënyra sesi vishen prostitutat-taka të larta, fustan mbi gju, gjithçka e ekspozuar. Kë po përpiqesh të ndjellësh? Ti nuk ke të drejtë të përdorësh titullin “mësuese”. Nuk është aspak e habitshme që i ke çmendur djemtë e rinj dhe vetëm një hap të ndan nga pedofilia.”, shkruante ndër të tjera ajo.
Duke mohuar se ishte veshur në mënyrë të papërshtashme në klasë, mësuesja tha se është e drejta e saj që të merrej me hobi në kohën e lirë. Por jo gjithçka shkoi keq, pasi e gjithë kjo ndodhi pati reagime të ndryshme. Në mbështetje të Tatianës doli edhe Ministri Rajonal i Arsimit, i cili u zotua se do t’i gjente mësueses një punë tjetër. Ai e cilësoi drejtoreshën e shkollës të prapambetur, teksa shtoi se Rusisë i duhen mësues që promovojnë jetesë të shëndetshme dhe sport./Opinion.al
