Mediat argjentinase kanë publikuar një mesazh zanor që Emiliano Sala iu ka dërguar miqve të tij, pak para se të zhdukej aeroplani në të cilin ai ndodhej.
Në audio mesazhin, i cili thuhet se është dërguar në një grup në WhatsApp të përbërë nga miqtë dhe shokët e 28-vjeçarit thuhet: “Përshëndetje vëllezër të vegjël, si jeni njerëz të krisur? Jam vërtet i lodhur, isha këtu në Nantes duke bërë gjëra, gjëra, gjëra dhe gjëra, dhe nuk po ndalen kurrë, nuk ndalen, nuk ndalen. Jam në një aeroplan që duket se po shkatërrohet dhe po shkoj në Cardiff, çmenduri, nesër veç fillojmë, kurse pasdite nisim stërvitjen, djema, në ekipin tim të ri”, ka thënë fillimisht ai.
Ndërsa më pas, në një tjetër mesazh, siç transmeton Daily Mail, Sala ka thënë: “Si jeni njerëz, krejt mirë? Nëse nuk merrni ndonjë lajm nga unë brenda një ore e gjysmë, nuk e di nëse duhet ta dërgoni dikë të më gjejë… Shumë zhurmë. Sa shumë kam frikë!”.
28-vjeçari mësohet se ishte rrugës për të takuar kolegët e tij të rinj të Cardiff City, pasi firmosi marrëveshjen prej 15 milionë paundësh. Sipas policisë franceze, lidhjet mes radarit dhe avionit tip “Piper Malibu” u ndërprenë të hënën në mbrëmje, rreth orës 20:30. Aeroplani fluturonte mbi Kanalin Anglez pranë farit të Casquets. Në bordin e Piper Malibu dyshohet se ishte vetëm sulmuesi 28-vjeçar dhe piloti.
Policia e Guernseyt i ka gjetur disa objekte që lundronin mbi ujë, mirëpo nuk ka arritur të konfirmojë nëse kanë qenë nga ai aeroplan. Ndërkohë, ekipet e kërkim-shpëtimit mbrëmjen e së martës i kanë pezulluar kërkimet, të cilat do t’i rifillojnë sot në mëngjes./E.M
