Përmes faqes së internetit, Ministria e Brendshme njoftoi mesditën e sotme shkarkimin e Drejtorit të Përgjithshëm të Policisë së Shtetit, Haki Çako. Duke kërkuar mes radhëve, nuk gjejmë asnjë motivacion konkret për shkarkimin e Haki Çakos. Aty thuhet vetem se “duhen energji të reja në polici”. Edhe pse opozita e ka kërkuar disa here largimin e tij, sidomos pas daljes së emrit të Tahirit në përgjimet e trafikantëve të drogës, kjo nuk permendet nga Ministria e Brendshme.
Duket se vendimi i Fatmir Xhafajt dhe sigurisht Kryeministrit Rama ka qenë “surprizë” edhe për vetë Çakon i cili nuk pranoi të komentojë, por tha shkurt për mediat: “Po jam njohur me vendimin e shkarkimit tim nga detyra”.
Ndër rreshta, në njoftimin e ministrisë thuhet se Xhafaj e ka thirrur në zyrë Cakon dhe pas një bisede të gjatë i ka komunikuar vendimin e shkarkimit. “Çako ka drejtuar me profesionalizëm struktura të niveleve të ndryshme”, thuhet në njoftim. “Megjithëatë për realizimin e objektivave të këtij mandati qeverisës, në fushën e rendit dhe sigurisë publike, sfidat që e presin Policinë e Shtetit, kërkojnë një ritëm më të shpejtë dhe dinamikë të madhe pune. Për këtë arsye është i domosdoshëm një lidership i ri, me energjitë të reja për të motivuar dhe çuar përpara punën e Policisë së Shtetit”, thuhet në njoftim. Pra “na duhet drejtuesi i ri”, me kaq është mjaftuar Ministri për të përcjelle vendimin e rëndësishëm.
/Opinion.al
