Në fillim të shkurtit këngëtarja Elvana Gjata u rikthye për publikun shqiptar me një koncert recital, me një album, dhe madje edhe me një dokumentar. Rikthimi i këngëtares mori një vëmendje të madhe mediatike. I gjithë projekti u pagëzua me numrin “3”, dhe sigurisht kjo kishte edhe një simbolikë të veçantë. Por përveç lëvdatave, Elvana nuk mund t’i shpëtonte dot as syrit të mprehtë të kritikëve. Perfeksioni të cilin na prezantoi Elvana në këtë projekt nuk qenka edhe aq origjinal mesa duket.
Këtë e kanë vënë re djemtë e “Çmendinës”, të cilët kanë renditur të gjitha ngjashmëritë mes projektit të Elvanës, dhe një projekti që Beyonce solli disa kohë më parë. Në një kronikë sarkastike, si të gjithë kronikat e këtij emisioni Elvana është vënë përballë projektit të Beyonces me titull “Year of 4”. Në fakt të dy dokumentarët kanë elementë shumë të ngjashëm me njëri-tjetrin, por Beyonce e ka bërë këtë gjë shumë vite më parë.
“Elvana Gjata me dokumentarin e saj “3” ose ndryshe Beyonce e Shqipërisë. Po pse e krahasojnë me Beyonce-në këta? Po se çuditërisht nga skenari i ngjante pak”, tha narratori i parë, duke ia pritur i dyti: “Pak si shumë”. Pas kësaj hyrjeje nis rrëfimi i Elvanës teksa thotë: “Kur jam në punë, kam një energji, një adrenalinë që më mban motorët ndezur gjithë kohën. As nuk ha, as nuk pi, as nuk fle… Dhe ndonjëherë mendoj që të gjithë janë kështu si unë, as nuk hanë, as nuk pinë, as nuk flenë. (Narratori: Po fiks, edhe Beyonce kështu është…). Ndërkohë në monitor shfaqej Beyonce e cila paska të njëjtin stil përkushimi në punë si Elvana: “Unë jam shumë e dhënë pas punës. Dhe nuk e pranoj fjalën “jo”. As nuk vë gjumë në sy. Nëse unë nuk fle, askush nuk fle”. Më pas Elvana rrëfen arsyen pse e titulloi albumin “3”. “Albumi quhet “3”, pasi 3 është numri im i fatit, 3 është ditëlindja ime, 3 është dita e koncertit, 3 është numër hyjnor pasi unë besoj në Zot, dhe madje madje 3 është dhe pallati i prindërve të mi, si për koiçidencë”. “Po Beyonce si e ka titullin e dokumentarit? Ah, ajo e ka “4”, për të cilin tregon: “E kam titulluar albumin “4”, sepse është numri im i preferuar, që fëmijë. Është ditëlindja ime, më 4 shtator. Është ditëlindja e nënës sime më 4 janar, është ditëlindja e burrit tim, më 4 dhjetor. Është përvjetori i martesës sime”. Pastaj shfaqet Elvana duke ecur në orën 00:03 të natës, e cila duket gati e dorëzuar nga lodhja për dokumentarin: “E sinqerisht s’e kuptoj pse e mora përsipër ta bëj këtë gjë, a do të ishte 100 mijë herë më mirë që të bëja videoklipin…! Dhe djemtë vazhdojnë thumbimet ndërsa bëjnë pyetjen: “Po pse vallë e mori përsipër ta bënte? Po, sepse e ka bërë Beyonce..”, e cila citohet po ashtu të thotë në dokumentarin e saj: “Kur bëra këngën “Girls”, mendoja me vete: O Zot, çfarë po bëj, pse jam këtu, çfarë po bëj, ç’m’u desh mua?!”Po le të kalojmë tani nga “skenari origjinal” tek ky “plan origjinal”, shprehen komentuesit duke fokusuar ushqimet e porositura të vendosura në banakun e kuzhinës, që në planin pasues të kameras ndodhesin në tavolinë sikur i kishte gatuar mamaja e Elvanës, për të drekuar bashkë tetë ditë para koncertit. “Kjo fërgesa shumë e mirë”, tha Elvana tek po shijonte ushqimin, dhe nëna ia ktheu: “Patëllxhanin e kam bërë sot, fërgesën e bëra dje”, por që sipas komentuesve, në fakt i ka gatuar kuzhinieri. Kronika me përballjen e dokumentareve të Elvanës me Beyoncen, mbyllet me urimin: “Hajt ta gëzosh 3-shin!
Pra duke marrë parasysh kronikën e “Çmendinës” dhe faktet e nxjerra prej tyre, mund të themi që ngjashmëria është e madhe mes dy dokumentarëve. Beyonce e ka publikuar dokumentarin në vitin 2011, ndërsa Elvana 7 vite më pas. A mund të themi që dokumentari i Elvanës është frymëzuar nga ai i Beyonce, apo thjesht një koiçidencë? Këtë gjykojeni ju.
(Më poshtë keni videot e të dy dokumentarëve)
