Gjyqi ndaj Shullazit sot mori një tjetër rrjedhë. Gjykata vendosi me kërkesë të të pandehurit që të paraqitet për të dëshmuar ish-kryeministri Sali Berisha.
Në fakt kërkesa u artikulua fillimisht nga ish-ministri Saimir Tahiri. Në dëshminë që zgjati rreth 15 minuta, ish – Ministri Tahiri ka thënë para trupit gjykues se është vënë në dijeni për kërcënimin e dy profesorëve Dhori Kule dhe Mynyr Koni nga postimi publik i ish – kryeministrit Sali Berisha në facebook, në Prill të 2016 -ës.
Tahiri mësohet se ka shprehur habi dhe ka përmendur disa herë se përse ish – Kryeministrin Berisha nuk ishte në proces për të dëshmuar. “Po Berisha nga e kishte informacionin per kercenimin e pedagogeve? Pse nuk vjen te jape versionin e tij”, ka thene Tahiri.
Ndërsa numri një i Policisë së Shtetit, Haki Çako tha se pasi është vënë në dijeni ka kontaktuar me profesorët dhe ata i kanë konfirmuar për kërcënimin e ardhur nga të pandehurit.
Pas dëshmive, avokatët e të pandehurit Shullazi i kërkuan gjykatës që të thërritet si dëshmitar ish – Kryeministri Berisha, kërkesë kjo e cila u pranua nga gjykata.
Gjithashtu sot para trupit gjykues kanë dhënë dëshmitë e tyre edhe pedagogët e UT: Dhori Kule, Mynyr Koni, Klodeta Dibra, Shezai Rrokaj dhe Majlinda Keta.
Kujtojmë se në prill 2016, ish kryeministri Berisha denoncoi në media se Mynyr Koni ishte kërcënuar me jetë për t’u tërhequr nga gara për Rektor në Universitetin e Tiranës, e pas kësaj akuze me kërkesë të Prokurorisë u arrestua Emiliano Shullazi.
Tahiri replikë me gjyqtarin
Tahiri: Kërcënimin për Konin e mora vesh nga Berisha përmes një statusi që ai kishte bërë. Nuk e kuptoj pse nuk e keni thërritur këtu për të dëshmuar. Kështu është kur Prokuroria bën politikë.
Gjyqtari: Lëri keto po jep dëshminë!
Tahiri: E di ti apo unë se si e jap dëshminë?… Pasi mora vesh kërcënimin i thirra në zyrë Nikollën, Konin dhe Kulen, Çakon. Do të thërrisja dhe Berishën, por e dija qe s’më përgjigjej. Emrin e Shullazit e mësova nga Berisha, pastaj bëra verifikimet dhe delegova punën. Nuk mbaj mend shumë detaje. I qendroj deklaratës së Prokurorisë, për më shumë thërrisni Berishën dëshmitar.
/Opinion.al
