Në shenjë solidariteti për ngjarjen tragjike që ndodhi në Bullgari, ku një autobus maqedonas u përfshi në një aksident rrugor dhe si pasojë e të cilit humbën jetën të paktën 45 persona, Kosova dhe Bullgaria kanë vendosur të shpallin të mërkurën ditë zie.
Për Bullgarinë lajmi u bë i ditur nga zëvendëskryeministri i Bullgarisë Galab Donev.
Ndërsa vendimin për Kosovën e mori presidentja, Vjosa Osmani, në bazë të kompetencave të saj kushtetuese.
“Në mbështetje të legjislacionit në fuqi, Presidentja ka marrë vendim të mërkurën, me 24 nëntor 2021, të shpallet ditë zie shtetërore në shenjë solidarizimi dhe nderimi të qytetarëve të Maqedonisë së Veriut, shumica dërmuese bashkëkombës tanë, të cilët kanë humbur jetën tragjikisht në aksidentin që ndodhi në Bullgari”, shkruhet në dekret.
Të paktën 45 persona, duke përfshirë 12 fëmijë, humbën jetën me një autobus që udhëtonte nga Stambolli për në Shkup. Shumica e viktimave janë shqiptarë.
Aksidenti konsiderohet si më i rëndi që ka ndodhur në 10 vjetët e fundit në Evropë./Opinion.al
