Zëvendës-administratori i emëruar nga Rusia në rajonin Kherson, Kirill Stremousov, ka deklaruar në një mesazh Telegram, shumë shpejt do të nisë beteja për Kherson.
“Në të ardhmen shumë të afërt, beteja për Kherson do të fillojë. Popullsia civile këshillohet të largohet nga zona e armiqësive të ashpra të ardhshme, nëse është e mundur, në mënyrë që të mos ekspozohet ndaj rrezikut të panevojshëm”, shtoi Stremousov.
Komandanti i ri i ushtrisë së Moskës në Ukrainë ka njoftuar se civilët po zhvendosen nga qyteti jugor Kherson i pushtuar nga Rusia, duke e përshkruar situatën ushtarake si të tensionuar.
“Armiku vazhdimisht përpiqet të sulmojë pozicionet e trupave ruse”, tha Sergei Surovikin në intervistën e tij të parë televizive që nga emërimi në fillim të këtij muaji, duke shtuar se situata ishte veçanërisht e vështirë rreth qytetit jugor të pushtuar Kherson.
