Në seancën e sotme gjyqësore ndaj Shullazit është realizuar përballja mes tij dhe dëshmitarit të mbrojtur Ylvi Beqja që e akuzon për gjobëvënie.
Beqja ia tha në sy Shullazit dhe anëtarët e tjerë të grupit se i kanë vënë gjoba si dhe e kanë kërcënuar. Madje kërcënimet sipas tij janë bërë edhe gjatë kohës që ka qenë nën mbrojtjen e policisë.
Më tej Beqja tha se i kanë ofruar para që ai të tërheqë denoncimin që bëri në Polici.
“Më kanë ofruar 7 milionë euro për t’u tërhequr. 1 milionë në dorë, të tjerat brenda muajit”, tha Ylvi Beqja në sallën e gjyqit.
Emiljano Shullazi dhe 4 të tjerë nga ana tjetër akuzojnë prokurorët se kanë falsifikuar dokumentet duke i fajësuar me pa të drejtë.
Të pandehurit kanë pretenduar se dy procesverbalet e marrjes në pyetje të Ylvi Beqajt janë falsifikuar.
Të pandehurit kanë kërkuar pezullimin e gjykimit ndaj tyre deri në sqarimin e plotë të pozicionit të dy prokurorëve. Ata e kanë paraqitur si rast precedenti një vendim të Gjykatës së Lartë për çështjen “Grori”. Trupi gjykues pranoi që kallëzimi të depozitohet në Prokurori.
Emiljano Shullazi, Gilmando Dani, Endrit Qyqja, Endrit Zela, Blerim Shullazi janë në bankën e të akuzuarve për kërcënime dhe gjobëvënie.
