Kryeministri Edi Rama thotë se shtyrja e hapjes së kampit për të pritur emigrantët në Gjadër, që ishte parashikuar me 20 maj, është një çështje që i përket shtetit italian.
Në një intervistë për gazetarin e “La Repubblica”, Gerardo Greco, kreu i qeverisë shqiptare ia faturoi përgjegjësinë mos realizimin në kohë të këtij projekti qeverisë italiane.
Hapja e dy qendrave për pritjen e emigrantëve në Shëngjin dhe Gjadër ishte planifikuar më 20 maj, por u shty për shkak se punimet nuk kishin përfunduar.
Për kryeministrin Edi Rama problem do të jetë funksionimi i tij, pasi do të jetë shumë e vështirë për procedurat dhe menaxhimin e 3 mijë personave në 28 ditë me burokracitë italiane dhe rregullat evropiane.
“Qendra do të jetë gati për disa muaj gjithsesi, kjo nuk është asgjë! Por problemi do të jetë funksionimi i saj! Dhe do të jetë shumë e vështirë për procedurat: si do të menaxhoni 3000 persona në 28 ditë me burokracitë italiane dhe rregullat evropiane?”,-tha Rama.
Sipas marrëveshjes mes qeverisë shqiptare dhe asaj italiane, emigrantët do të qëndrojnë në kampin e Gjadrit gjatë periudhës që kryhen procedurat për azil në Itali.
