Kreu i grupit parlamentar të Partisë Socialiste, Taulant Balla, gjatë një dalje për mediat ditën e sotme, tha se nuk do të ketë negociata me PD për zgjatjen e afatit të vettingut.
Balla u shpreh se Reforma në Drejtësi është iniciuar nga partnerët ndërkombëtarë dhe deri më tani ky proces ka ecur përtej pritshmërive.
Më tej, Balla ritheksoi që grupi parlamentar i PS, s’do të hyjë në diskutim për këtë çështje pasi sipas tij është e rëndësishme që politika të rrijë larg Reformës në Drejtësi dhe vettingut në veçanti.
“As ka pasur, dhe as nuk do të ketë negociatë për këtë gjë. Është një rekomandim që ka ardhur nga partnerët dhe institucionet që monitorojnë proceset e vetingut. Deri më tani ky proces ka ecur shumë mirë, madje përtej pritshmërive.
Askush nuk e dinte që një numër i madh prokurorësh dhe gjyqtarët do të shkarkoheshin. Në këtë këndvështrim dua të ritheksoj që grupi parlamentar i PS, s’do të hyjë në diskutim për këtë çështje. E rëndësishme është që politika duhet të rri larg Reformës në Drejtësi dhe vettingut në veçanti dhe themeli i saj ka qenë largimi i politikës në reformën në drejtësi.
Propozimi që ka ardhur në një grup deputetësh është diskutuar gjatë, që nga legjislatura e kaluar me ata që kanë monitoruar implementuar reformën në drejtësi në Shqipëri dhe mos futja e politikës në këtë proces është tejet jetik për vijueshmërinë e Reformës në Drejtësi”, Balla.
