Presidenti i Shteteve të Bashkuara, Donald Trump, u shpreh se udhëzimet federale kundër koronavirusit, do të vazhdojnë në gjithë SHBA-në, së paku deri më 30 prill.
Megjithëse presidenti Trump kishte deklaruar më parë që planifikonte kthimin e biznesit dhe jetës normale brenda 12 prillit, ekspertët e shëndetit publik paralajmëruan se heqja e kufizimeve deri në Pashkë, do të shkaktonte vdekje të panevojshme dhe dëme ekonomike më të mëdha se sa izolimi.
“Asgjë nuk do të ishte më e keqe se shpallja e fitores para se të fitohej fitorja. Edhe unë, do të doja që t’i ktheheshim jetës sonë.” u shpreh Trump, në një konferencë për shtyp të dielën në mbrëmje, pasi shtoi se me shumë gjasa në dy javët e ardhshme numri i vdekjeve në Amerikë pritet të ketë pikun.
Trump u shpreh se administrata e tij po shton udhëzimet ndaj qytetarëve në mënyrë që të shmanget një numër i madh vdekjesh, teksa tregoi se ekspertët kanë parashikuar në skenarin më të keq rreth 2.2 milion vdekjeve në SHBA.
Trump tha se administrata po punon për të mbajtur numrin e parashikuar të vdekjes nën 100 mijë.
Më parë gjatë ditës, këshilltari shëndetësor i Shtëpisë së Bardhë, Dr Anthony Fauci tha se në SHBA mund të ketë deri në 200 mijë vdekje si pasojë e komplikacioneve të shkaktuara tek personat nga koronavirusi, si dhe miliona të infektuar, megjithëse ai paralajmëroi se numrat bazohen në modele dhe asgjë nuk është e sigurt.
Ndërsa, Trump mund të nxjerrë udhëzime federale, ai nuk ka fuqinë të vendosë nëse vendi mund të rihapet, pasi ato vendime po merren nga qeveritarët e secilit shtet.
Sipas të dhënave nga Universiteti Johns Hopkins, SHBA-të janë në vend të parë për numrin e të infektuareve, rreth 143 mijë të prekur, 2509 prej të cilëve kanë humbur jetën./Opinion.al
