Komiteti Gjyqësor i Dhomës së Përfaqësuesve në Shtetet e Bashkuara shtyu për ditën e sotme votimin për akuzat kundër presidentit Donald Tump.
Vendimi u mor nga kreu i Komitetit, Jerry Nadler pas dy ditësh debat. Të martën, Komiteti prezantoi dy akuza kundër presidentit: e para për abuzim me pushtetin dhe e dyta për pengim të punës së Kongresit.
Trump po përballet me procedurat e shkarkimit nga detyra, të cilat i kanë nisur rivalët e tij, demokratët, gjatë muajit shtator.
Presidenti dyshohet se i ka kërkuar ndihmë homologut ukrainas, për të hetuar kundërshtarin e tij të mundshëm në zgjedhjet e vitit 2020, Joe Biden.
Trump i ka mohuar këto pohime, por kërkimi i ndihmës nga jashtë për të fituar zgjedhjet në SHBA, është akt i paligjshëm.
Republikanët kanë bërë përpjekje t’a bllokojnë procesin, duke e cilësuar si sulm të paligjshëm mbi presidentin.
Komiteti Gjyqësor, i cili kontrollohet nga demokratët pritet t’i miratojë akuzat.
Votimi i tyre i plotë në Dhomën e Përfaqësuesve do të pasojë javën e ardhshme. Megjithatë, Senati, i cili kontrollohet nga republikanët e presidentit, nuk pritet ta shkarkojë atë nga detyra.
Trump përsëriti të enjten në Tëitter se nuk ka bërë “asnjë krim”. Nadler tha se votimi të premten nuk do të zhvillohet para orës 10:00, sipas kohës lokale.
