Është mbajtur këtë të martë në Gjykatën e Posaçme kundër Korrupsionit dhe Krimit të Organizuar seanca, ku pritej që të jepej pretenca për çështjen e Gërdecit.
Shkak i shtyrjes është bërë mungesa e avokatëve. Mësohet se seanca e radhës është lënë më datë 24 maj.
Ndërkaq ditën e sotme nëna e një prej viktimave, Zamira Durda kërkoi sërish që të bëhet palë në procesin ndaj Mediut.
SPAK ka dërguar për gjykim ish-ministrin e Mbrojtjes, Fatmir Mediu, i cili akuzohet se në lidhje me procesin e çmilitarizimit dhe çmontimit të municioneve që është zhvilluar në ambientet e ish “Brigatës së Tankeve”, në fshatin Gërdec, në bashkëpunim me funksionarë të tjerë të Ministrisë së Mbrojtjes si dhe persona që kanë pasur cilësinë e ushtarakut kuadër komandues, ka nxjerrë disa akte nënligjore në kundërshtim me ligjin.
Sipas SPAK, Mediu ka dëmtuar interesat e shtetit dhe ka favorizuar 2 kompanitë, ‘SAC’ dhe ‘Albademil’.
Për këtë çështje ai akuzohet për “shpërdorim detyre” referuar Kodit Penal dhe “Shpërdorim i detyrës” në bashkëpunim me subjekt ushtarak-kuadër komandues.
